Azərbaycan, Bakı, 01 iyul / Trend , müxbir A.Hüseynbala /
Azərbaycanın bir qrup müxalifət partiyasının birləşdiyi ittifaq Dağlıq Qarabağ probleminin həllində qeyri-hökumət təşkilatlarının heç bir rolunun olmadığını düşünür.
"Bu, ümummilli problemdir, bununla bağlı dövlət səviyyəsində, yaxud ölkənin aparıcı siyasi qüvvələrinin iştirakı ilə ümumi mövqeyə gəlmək mümkündür", - çərşənbə günü Trend -a Demokratiya Uğrunda İttifaqda (DUİ) təmsil olunan Azadlıq Partiyasının sədri Əhməd Oruc bildirib.
Trend -un arayışı: Demokratiya Uğrunda İttifaq iyulun 3-də Dağlıq Qarabağ münaqişəsinin nizamlanması ilə bağlı aparılan danışıqların hazırki vəziyyətini müzakirə etmək üçün növbəti "Qarabağ forumu" keçirəcək. Azərbaycanın müxalifyönlü Vətəndaş Həmrəyliyi Partiyası da bu günlərdə siyasi partiyaların və qeyri-hökumət təşkilatlarının iştirakı ilə Dağlıq Qarabağ probleminə həsr olunan forum keçirilməsi təşəbbüsü ilə çıxış edib.
İki Cənubi Qafqaz ölkəsi arasında münaqişə 1988-ci ildə Ermənistanın Azərbaycana qarşı ərazi iddiası irəli sürməsi zəminində yaranıb. Azərbaycan torpaqlarının 20 faizi, yəni Dağlıq Qarabağ ərazisi və bu əraziyə bitişik 7 rayon Ermənistan Silahlı Qüvvələrinin işğalı altındadır. 1994-cü ildə tərəflər atəşkəs rejiminə dair razılaşma əldə ediblər və o vaxtdan bəri ATƏT-in Minsk Qrupunun himayəsi altında, Rusiya, Fransa və ABŞ-ın həmsədrliyi ilə hələ də nəticəsiz sülh danışıqları aparılır.
Orucun sözlərinə görə, Dağlıq Qarabağ problemi ilə bağlı daimi müzakirələr təşkil edən forum var. "Forumun daimi işçi qrupu fəaliyyət göstərir və artiq doqquzuncu tədbirin keçirilməsi qərara alınıb", - partiya sədri əlavə edib.
Onun fikrincə, başqa partiyaların Dağlıq Qarabağ münaqişəsi ilə bağlı tədbir keçirməsinə qadağa qoymaq niyyətləri yoxdur. "Amma Azərbaycanda fəaliyyət göstərən qeyri-hökumət təşkilatlarının arasında Qarabağ adından sui-istifadə edənlər var. Əgər tədbirdə həmin təşkilatlar da iştirak edəcəksə, hansı uğurlu nəticədən danışmaq olar", - Oruc vurğulayıb.
Dеmоkrаtiyа Uğrunda İttifаqı 2005-ci il parlamеnt seçkisindən sonra müxalifətçi Klassık Xalq Cəbhəsi, Azadlıq və Milli Demokratiya partiyaları yаrаdıb. 2008-ci il sеntyаbrın əvvəllərində Böyük Azərbаycаn, nоyаbr аyındа isə Хаlq pаrtiyаlаrı DUİ-yə üzv qəbul оlunub. İttifаq bu pаrtiyaların məşvərət və əməkdaşlıq qurumudur.
Məqalə müəllifi ilə əlaqə ünvanı: [email protected]
...