Azərbaycan, Bakı, 06 avqust / Trend , müxbir C.Babayeva /
Azərbaycanın müxalifyönlü Müasir Müsavat Partiyası (MMP) siyasi proqramına dəyişikliklər etməyi təxirə salıb.
"Partiyanın proqramına dəyişikliklərin qəbul edilməsi üçün Siyasi Şuranın iclası iyulun sonunda keçirilməli idi. Rayon təşkilatlarının xahişi ilə iclas sentyabra qədər təxirə salınınb", - cümə axşamı Trend -a MMP sədri Hafiz Hacıyev bildirib.
Onun sözlərinə görə, rayon təşkilatları siyasi proqrama ediləcək dəyişiklikləri dəstəklədiklərini bildiriblər. "Dəyişikliklərin ana xəttini ölkədə sabitliyin qorunub saxlanması, korrupsiyaya qarşı mübarizədə radikal addımların atılması və Dağlıq Qarabağ münaqişəsinin həllində dövlət başçısının mövqeyinə ictimai dəstəyin göstərilməsi təşkil edir", - Hacıyev deyib.
MMP sədri sentyabr-oktyabr aylarından başlayaraq siyasi fəaliyyətlərini gücləndirəcəklərini bildirib. "Ölkədə korrupsiyaya qarşı mübarizənin gücləndirilməsi tələbi ilə Bakıda kütləvi aksiyalar keçirmək niyyətindəyik. Kütləvi aksiyalara digər siyasi partiyaların da qoşulacağı gözlənilir", - o deyib.
Trend -un arayışı: Hacıyev 1992-93-cü illərdə "Azərbalıq" Dövlət Konserninin sədri olub. 2000-ci ildə Müasir Müsavat Partiyasını təsis edib, partiya 2002-ci ildə dövlət qeydiyyatından keçib. Ötən il keçirilən prezident seçkisində Hacıyev 0,65 faiz səs toplayıb.
Məqalə müəllifi ilə əlaqə ünvanı: [email protected]