Azərbaycan, Bakı, 07 avqust / Trend , müxbir R.Hafizoğlu /
Türkiyəli ekspret hesab edir ki, ölkə hakimiyyəti və güc strukturlarının ölkədə mövcud olan "Ergenekon" şəbəkəsinə qarşı çox saylı əməliyyatlar keçirməsinə baxmayaraq, təşkilat ilə sona qədər mübarizə aparmaq mümkün olmayacaq.
"Hakimiyyətin bütün cəhdlərinə baxmyaraq, "Ergenekon" təşkilatı ilə sona qədər mübarizə aparmaq mümkün olmayacaq", - deyə türkiyəli ekspert Şamil Təyyar cümə günü Ankaradan Trend -a telefonla bildirib.
Trend -un arayışı: Türkiyədə keçən ilin ortalarından etibarən "Ergenekon" adı altında fəaliyyət göstərən şəbəkə ifşa olunub. Hakimiyyət "Ergenekon"u terror təşkilatı adlandırıb. Güc strukturlarının keçirdiyi çox saylı əməliyyatlar nəticəsində gizli terror şəbəkəsinə daxil olan və bu qurumla əlbir olan bir çox universitet rektorları həbs edilib. Türkiyədə "Ergenekon" terror şəbəkəsinə qarşı sayca on əməliyyat keçirilib. 2009-cu ilin aprel ayında isə bu təşkilatın ölkənin baş naziri Rəcəb Tayyib Ərdoğana və prezident Abdullah Gülə qarşı hazırladığı sui-qəsd planı aşkarlanıb. Daha sonra isə Türkiyə mətbuatında iyunun 12-də Türkiyə ordusu tərəfindən hakim partiyaya qarşı çevriliş hazırlandığı iddia edilən sənədin nüsxəsi dərc edilib. Sənədin nüsxəsində Türkiyə ordusunun polkovniki Dursun Çiçəyin imzası ilə AKP-yə qarşı hərbi çevriliş cəhdi olduğu iddia edilirdi. Baş qərargah rəisi, ordu generalı İlker Başbuğ verdiyi açıqlamada belə bir planın olmadığını bildirsə də, polkovnik Çiçək iyunun 30-da həbs edildi və iki gün sonra sərbəst buraxıldı.
Türkiyə Milli Təhlükəsizlik Şurasının keçmiş katibi Tuncer Kılıc Türkiyə mətbuatında verdiyi müsahibədə "Ergenekon" əməliyyatlarını Türkiyədə islamçı qüvvələrin Silahlı Qüvvələrdən intiqam almaq cəhdi kimi qiymətləndirib.
Təyyarın fikrincə, "Ergenekon" məsələsində hakimiyyət və ordu arasında soyuqluğun olmasına baxmayaraq, bu istiqamətdə keçirilən əməliyyatlar davam etdiriləcək.
"Hesab edirəm ki , əgər "Ergenekon" təşkilatı məhkəmə qarşısında hakim partiyanın bağlanılması iddiası kimi təxribat xarakterli addım atarsa, hakimiyyət təşkilata qarşı daha sərt addım atacaq", - deyə Təyyar əlavə edib.
Ekspert hesab edir ki, "Ergenekon" təşkilatına qarşı aparılan əməliyyatlara baxmayaq, təşkilat ölkə hüdudlarını tərk etməyəcək. "Təşkilata qarşı keçirilən əməliyyatlara baxmayaraq, "Ergenekon"un digər qonşu ölkələrə və türkdilli ölkələrə keçmə ehtimalı, eəcə də ölkə daxilində genişlənmə ehtimalı yoxdur", - deyə Təyyar əlavə edib.
Hakimiyyətin "Ergenekon"a qarşı sona qədər mübarizə apara bilməməsinə gəlincə, Təyyar bunu dövlət orqanları arasında səmimi iş birliyinin olmaması ilə izah edib. "Türkiyədən fərqli olaraq bir çox Avropa ölkələrində qeyri-leqal təşkilatlara qarşı aparılan mübarizə zamanı dövlət aidiyyatı orqanlarla birgə fəaliyyət göstərir", - deyə o bildirib.
Təyyar hesab edir ki, "Ergenekon"a qarşı keçirilən əməliyyatlarla bağlı həm orduda, həm məhkəmədə, həm də müxalifət partiyaları arasında ciddi narazılıqlar var. "Ergenekon"a qarşı aparılan əməliyyatlara hamı tərəfində yetərincə dəstək verilmir", - deyə o qeyd edib.
Ekspert hesab edir ki, Türkiyədə qeyri-leqal təşkilatlara qarşı mübarizədə ümumiyyətlə əvvəlki illərdən fərqli olaraq daha çox nailiyyət əldə olunub.
Məqalə müəllifi ilə əlaqə ünvanı: [email protected]
