Azərbaycan, Bakı, 18 avqust / Trend , müxbir C.Babayeva /
Azərbaycanın Yaşıllar Partiyası (AYP) transsərhəd çayların çirkləndirilməsi probleminin həlli ilə bağlı təkliflə çıxış edib.
"Azərbaycan hökuməti Gürcüstan ərazisində təmizləyici qurğuların tikilməsinə yardım edə bilər. Gürcüstan təmizləyici qurğuların tikilməsi üçün maliyyə vəsaitinin olmadığını bildirir. Qurğunun tikilməsi üçün Azərbaycan Gürcüstana kredit ayıra bilər", - çərşənbə günü Trend -a AYP sədri Mais Güləliyev bildirib.
Trend -un arayışı: Azərbaycanın Ekologiya və Təbii Sərvətlər Nazirliyi transsərhəd çayların (Kür, Araz) çirkləndirilmə səviyyəsini öyrənmək məqsədilə mütəmadi olaraq monitorinqlər aparır. Monitorinqlərin nəticələrinə əsasən, transsərhəd çayların Ermənistan və Gürcüstan tərəfindən çirkləndirilmə səviyyəsi normadan artıqdır.
Transsərhəd su hövzələri problemlərinin beynəlxalq normalar çərçivəsində regional səviyyədə həlli üçün Azərbaycan "Transsərhəd çaylar və göllərin mühafizə və istifadəsi" adlı Helsinki konvensiyasını ratifikasiya edib. Ermənistan və Gürcüstanın bu konvensiyaya qoşulmaması problemi çətinləşdirir.
Güləliyevin sözlərinə görə, transsərhəd çayları daha çox çirkləndirən Ermənistanla müharibə şəraitində olduğumuza görə ona təsir imkanımız yoxdur. "Gürcüstanın çayları çirkləndirmə səviyyəsi Ermənistandan az deyil. Azərbaycan Gürcüstanın demək olar ki, bütün sahələrinə vəsait ayırır və ona kifayət qədər təsir vasitələri var. Gürcüstanın Azərbaycandan kifayət qədər asılı olduğu bir dövrdə Azərbaycan Gürcüstanın Kür çayı ilə bağlı siyasətinə təsir etməlidir", - o deyib.
AYP sədri Azərbaycanın Kür çayı boyunca yerləşən şəhər və kəndlərində çayın müəyyən qədər çirkləndirildiyini bildirib. "Nə vaxta qədər ki, Azərbaycan, Ermənistan və Gürcüstan ayrı-ayrlıqda, kifayət qədər zəif, inteqrasiyaya cəhd etməyən ölkələr olacaqlar, transsərhəd çayların həddindən artıq çirklənməsi problemi həmişə qalacaq", - o deyib.
Trend -un arayışı: Azərbaycan Yaşıllar Partiyası 2006-cı ilin dekabrında yaradılıb və hələ Ədliyyə Nazirliyində dövlət qeydiyyatına alınmayıb.
Məqalə müəllifi ilə əlaqə ünvanı: [email protected]
