Azərbaycan, Bakı, 1oktyabr / Trend , müxbir A. Hüseynbala/
Azərbaycanın müxalifət partiyası təmsil olunduğu hərəkat daxilində yaranan problemin aradan qaldırılması üçün dörd təklif irəli sürüb.
"Birinci təklifimizdə Ümid Partiyasının sədri və Müsavat deputat qrupu üzvlərinin parlamentin və onun komitələrinin bütün iclaslarının işini boykot etməsi nəzərdə tutulur", - cümə axşamı Trend -a "Qarabağ və Respublika Uğrunda Hərəkat"da təmsil olunan Azərbaycan Liberal Partiyasının (ALP) sədr əvəzi Əvəz Temirxan bildirib.
Trend -un arayışı: "Qarabağ və Respublika Uğrunda Hərəkat"da təmsil olunan Müsavat Partiyası bir müddət əvvəl hərəkat üzvü olan Ümid Partiyasının seçki komissiyalarında təmsil olunan bütün üzvlərini geri çağırmağı tələb kimi irəli sürüb. Ümid Partiyasının sədri, millət vəkili İqbal Ağazadə isə Müsavat deputat qrupunun üzvlərinin mandatdan imtina edəcəyi təqdirdə şərtə əməl edəcəyini bildirib. Hər iki partiya qarşılıqlı irəli sürülən tələbləri yerinə yetirməyə razılaşmadıqları üçün hərəkat daxilində ciddi böhran yaranıb.
Temirxanın sözlərinə görə, onlar Ümid Partiyasının seçki komissiyalarında təmsil olunan üzvlərinin də fəaliyyətlərini müvəqqəti dondurmalarını təklif edirlər. "Biz düşünürük ki, həm Ümid, həm də Müsavat partiyaları bu təkliflə razılaşarlarsa, hərəkat daxilində yaranan problemi həll etmək mümkündür", - ALP funksioneri əlavə edib.
Temirxan deyib ki, ikinci təklifləri hərəkat daxilindəki mübarizənin yalnız Dağlıq Qarabağ probleminin həlli istiqamətinə yönəldilməsi ilə bağlıdır. "Digər təklifimiz isə seçkilərlə bağlıdır. Bizim fikrimizcə, hərəkata üzv olan partiyalar arasında yenidən məsləhətləşmələr başlanmalıdır. Bu zaman heç bir şərt irəli sürülmədən hərəkat üzvü olan partiyaların bələdiyyə seçkilərində hamısının, yaxud iki partiyanın bir-biri ilə əməkdaşlığını razılaşdırmaq daha asandır", - partiyanın sədr əvəzi vurğulayıb.
ALP-nin sədr əvəzi deyib ki, dördüncü təklifləri parlament seçkiləri ilə bağlı müxalifətin daha böyük birliyinin yaradılması ilə bağlı məsləhətlərə başlanılmasıdır. "Əgər təkliflərimiz nəzərə alınarsa, onda hakimiyyətdən seçki kampaniyası müddətinin 4 aya və təbliğat kampaniyası müddətinin 2 aya qədər uzadılması tələbini də irəli sürmək daha asan olacaq", - Temirxan qeyd edib.
Azərbaycanda bələdiyyə seçkisinin 2009-cu il dekabrında keçirilməsi nəzərdə tutulur. Bundan əvvəl iki dəfə - 1999 və 2004-cü illərdə yerli özünüidarəetmə orqanlarına seçkilər keçirilib.
Azərbaycanda bələdiyyələrin birləşdirilməsi prosesi nəticəsində onların sayı 2760-dan 1718-ə qədər enib.
"Qarabağ və Respublika Uğrunda Hərəkat"ı Azərbaycan Xalq Cəbhəsi, Vətəndaş və İnkişaf, Liberal, Demokrat, Müsavat və Ümid partiyaları 2009-cu il martın 18-də Konstitusiyaya təklif olunan əlavə və dəyişikliklərlə bağlı keçirilən referendum ərəfəsi təsis ediblər.
Məqalə müəllifi ilə əlaqə ünvanı: [email protected]