Azərbaycan, Bakı, 03 noyabr / Trend , müxbir A.Hüseynbala/
Azərbaycanın müxalifət partiyası təmsil olunduqları hərəkatla bağlı "Azadlıq" blokunun qərarını açıqlamamasını düzgün hesab etmir.
"Yalnız özlərinə məlum olan qərarı açıqlamayıb hərəkat daxilində yaranan böhranın öz-özünə həll olunacağını iddia etmək məntiqsizlikdir", - çərşənbə günü Trend -a "Qarabağ və Respublika Uğrunda Hərəkat"da təmsil olunan Azərbaycan Demokrat Partiyasının (ADP) sədri Sərdar Cəlaloğlu bildirib.
Trend -un arayışı: "Qarabağ və Respublika Uğrunda Hərəkat"da təmsil olunan Müsavat Partiyası Ümid Partiyasının seçki komissiyalarındakı üzvlərinin geri çağırılmasını tələb edir. Ümid Partiyası isə Müsavat depuatat qrupu üzvlərinin mandatlarından imtina edəcəyi təqdirdə tələbin yerinə yetirələcəyini bəyan edib. Hər iki partiya arasında yaranan bu gərginlik hərəkat daxilində ciddi böhrana səbəb olub.
Cəlaloğlunun sözlərinə görə, böhranın yeganə yolu bir yerə yığışıb aktiv müzakirə etməkdir. "Əgər tez-tez görüşlər keçirsək bir-birimizə təsir etmək imkanlarımız da artacaq. Böhranın başqa həlli yolu yoxdur", - partiya sədri əlavə edib.
Onun fikrincə, "Azadlıq" blokunun həqiqətən qərarı varsa, bunu elan etməlidir. "Bu zaman cəmiyyətə də hərəkata daxil olan partiyaların ümumi mövqeyi bəlli olacaq. Düşünürəm ki, blok qərarını açıqlasa, hərəkatda təmsil olunan Müsavat və Ümid partiyaları öz mövqelərinə yenidən baxa bilərlər", - Cəlaloğlu vurğulayıb.
ADP sədri qeyd edib ki, indiki qeyri-müəyyənliyə görə ictimaiyyət hərəkatın varlığını hər gün unudur. "Hesab edirəm ki, artıq hərəkatın fəaliyyətinin bərpası üçün şans yoxdur. Bu şansı Müsavat Partiyası bizim əlimizdən birmənalı şəkildə alıb. Digər tərəfdən, "Azadlıq" blokunun bu mövqeyi də hərəkatın yenidən bərpası şansını heçə endirir", - Cəlaloğlu xatırladıb.
"Mövcud olmayan hərəkatın fəaliyyətinin bərpası artıq hec cür mümkün deyil", - çərşənbə axşamı Trend -a "Qarabağ və Respublika Uğrunda Hərəkat"da təmsil olunan Müsavat Partiyası Mərkəzi İcra Aparatının rəhbəri Arif Hacılı bildirib.
Onun sözlərinə görə, mövcud olmayan qurum haqqında ümumiyyətlə danışmaq istəmir. "Biz mövqeyimizi dəfələrlə bildirmişik və geriyə hər hansı addım atmaq fikrində deyilik", - Hacılı vurğulayıb.
"Qarabağ və Respublika Uğrunda Hərəkat"ı Azərbaycan Xalq Cəbhəsi, Vətəndaş və İnkişaf, Liberal, Demokrat, Müsavat və Ümid partiyaları 2009-cu il martın 18-də Konstitusiyaya təklif olunan əlavə və dəyişikliklərlə bağlı keçirilən referendum ərəfəsi təsis ediblər.
Məqalə müəllifi ilə əlaqə ünvanı: [email protected]