Azərbaycan, Bakı, 11 noyabr / Trend , müxbir Ü.Sadıxova/
Türkiyənin təhsil müəssisələrində baş örtüyünün - hicabın geyilməsi problemi İslam Konfransı Təşkilatının müzakirə mövzusu deyil, çünki bu, Türkiyənin daxili siyasətinə aiddir. Bu barədə Trend -a Bakıda keçirilən "Sivilizasiyalararası dialoq: Azərbaycandan baxış" beynəlxalq konfransında iştirak edən təşkilatın baş katibi Ekmələddin İhsanoğlu bildirib.
"Hicab məsələsi çox şişirdilib. Bu problem Türkiyənin daxili vəziyyəti və vicdan azadlığına toxunur, buna görə də İKT bu məsələyə müdaxilə etməyə əsas görmür", - İhsanoğlu deyib.
Türkiyə konstitusiyasına əsasən, hicabın - müsəlmanların baş örtüyünün ictimai və təhsil müəssisələrində geyilməsi qadağandır. Türkiyənin hakim Ədalət və İnkişaf Partiyasının sözügedən qanunu ləğv etməsinə baxmayaraq, Konstitusiya Məhkəməsi bu qanunun bərpasına dair qərar qəbul edib.
Dünyada BMT-dən sonra ikinci böyük təşkilat olan İKT-nın baş katibinin sözlərinə görə, Türkiyə cəmiyyətində mübahisənin yaranmasına iki səbəb var: bəziləri hicaba müsəlman inancının vacib elementi kimi baxır və onun örtülməsini vacib hesab edir. Bəziləri isə hicaba adət-ənənə elementi kimi baxır və buna görə də onu vacib hesab etmir.
"Türkiyədə sözügedən problem geniş miqyas alıb, bu isə tədricən həll oluna bilər", - İhsanoğlu belə hesab edir.
İhsanoğlu İKT-nin Türkiyə hökuməti ilə hicab məsələsi ilə bağlı qarşıdurmaların aradan qaldırılmasında birgə iştirakını təkzib edib və bunun ölkənin daxili problemlərinə aid olması ilə əlaqəli olduğunu bildirib.
Avropa İttifaqı və ABŞ-ın Beynəlxalq din azadlığı üzrə komissiyası baş örtüyünün geyilməsinə qoyulan qadağanı insanların din azadlığı və ifadə azadlığı hüquqlarının pozulması hesab edir.
ABŞ-ın Dövlət Departamentinin din azadlığı üzrə illik məruzəsində hicabın örtülməsinə qadağa qoyulması din azadlığının və dini əqidənin ifadə olunması azadlığının pozulması formalarından biri adlandırılıb.
Məqalə müəllifi ilə əlaqə ünvanı: [email protected]