Azərbaycan, Bakı, 01 dekabr / Trend , müxbir A.Hüseynbala/
Azərbaycan Parlamentinin deputatı QİÇS-ə qarşı aparılan mübarizədən razıdır.
"Bizim həm hökumətimiz, həm də qanunverici orqanımız xəstəliyə qarşı mübarizənin gücləndirilməsi üçün bütün lazımı tədbirləri görür", - çərşənbə axşamı Trend -a Milli Məclisin Sosial siyasət komitəsinin üzvü Elmira Axundova bildirib.
Trend -un arayışı: 1988-ci ildən Ümumdünya Səhiyyə Təşkilatı (ÜST) dekabrın 1-ni Qazanılmış İmmun Çatışmazlığı Sindromu (QİÇS/AİDS) ilə Beynəlxalq Mübarizə Günü elan edib. Dünyada hər gün 18 min adam QİÇS virusuna-HİV-ə yoluxur.
Azərbaycan HİV-ə yoluxma səviyyəsi aşağı olan ölkələr sırasına daxil olsa da, problem aktual məsələ olaraq qalır.
Səhiyyə Nazirliyinin məlumatına görə, ölkəmizdə təkcə 2009-cu ilin 6 ayı ərzində 220 yeni HİV-ə yoluxma faktı aşkar olunub.
Ümumilikdə, Azərbaycanda HİV infeksiyasının ilk dəfə aşkar edildiyi 1987-ci ildən 2009-cu ilin 1 iyul tarixinədək Respublika QİÇS-lə Mübarizə Mərkəzində HİV infeksiyası təsdiq olunmuş 2034 nəfər rəsmi qeydiyyata götürülüb. Onlardan 78 nəfəri (3,8 faizi) əcnəbi, 1956 nəfəri (96,2 faizi) isə Azərbaycan vətəndaşıdır. HİV-ə yoluxmuş Azərbaycan vətəndaşlarından 1651-i (84,4 faizi) kişi, 305-i (15,6 faizi) qadındır. AİDS mərhələsində olan Azərbaycan vətəndaşlarının sayı 382 nəfər, AİDS-dən vəfat etmiş vətəndaşların sayı 260 nəfər olub.
HİV-ə yoluxmuş insanlara pulsuz qaydada Respublika QİÇS-lə Mübarizə Mərkəzində başlanılmış antiretrovirus (ARV) preparatları ilə müalicəyə 250-dən çox xəstə cəlb olunub. Onlardan 58 nəfərində müalicəyə 2009-cu ilin birinci yarısında başlanılıb.
Axundovanın sözlərinə görə, komitədə hazırlanan yeni qanun layihəsi də QİÇS-ə qarşı mübarizə sahəsində xüsusi əhəmiyyətə malik bir sənəd olacaq. "Həmkarım Musa Quliyev çox mükəmməl bir layihə hazırlayıb. Bu qanun qəbul olunandan sonra xəstəliyin daşıyıcıları olan insanlara cəmiyyətdəki münasibətin də dəyişilməsinə nail olacağıq", - millət vəkili əlavə edib.
Komitə üzvü deyib ki, layihə artıq komitədə ətraflı müzakirə olunub. "Məncə, layihə dekabr ayında parlamentin də müzakirəsinə çıxarılacaq. Biz bununla da ağır problemin həlli üçün öz töhfəmizi verəcəyik", - Axundova əlavə edib.
Məqalə müəllifi ilə əlaqə ünvanı: [email protected]