Azərbaycan, Bakı, 29 mart / Trend , müxbir K.Zərbalıyeva/
Fövqəladə Hallar Nazirliyi Bakı şəhərində iki gün öncə baş vermiş yanğınla bağlı apardığı araşdırmaları yekunlaşdırıb, nəticələrini Nazirlər Kabinetinə təqdim edəcək.
Fövqəladə Hallar Nazirliyindən bazar ertəsi Trend -a verilən məlumata görə, araşdırmaların nəticəsindən asılı olaraq həmin binada müvafiq tədbirlərin görülməsi Nazirlər Kabineti tərəfindən həll ediləcək.
Martın 27-də saat 21:00 radələrində Bakının İçərişəhər ərazisində, M. F. Vazeh küçəsində yerləşən üçmərtəbəli yaşayış binasında baş verən yanğın nəticəsində 1937-ci il təvəllüdlü Elmira Axundova və əri, 1925-ci il təvəllüdlü Akif Əhmədov ölüb. Yanğın nəticəsində 5 mənzildən ibarət üçmərtəbəli yaşayış binasının bütün yanar konstruksiyaları, binanın içərisində olan əşyalar tamamilə yanıb.
Hadisə yerinə 20-yə yaxın yanğınsöndürmə maşını və 6 "təcili tibbi yardım" maşını gəlib.
İçərişəhər ərazisində yanan bina Nazirlər Kabineti yanında "İçərişəhər" Dövlət Tarix-Memarlıq Qoruğu İdarəsinin balansındadır.
FHN-dən yanğının səbəblərinin araşdırıldığı bildirilib. Fövqəladə hallar nazirinin müavini Etibar Mirzəyev hadisə yerində jurnalistlərə açıqlamasında yanğının ilkin ehtimallara görə, qaz sızmasından baş verdiyini bildirib.
Səbail Rayon Polis İdarəsindən Trend -a verilən məlumata görə, hazırda FHN tərəfindən araşdırmalar aparılır, müvafiq ekspertizalar təyin edilib.
İdarədən verilən məlumata görə, hadisənin baş verməsində cinayət tərkibi müəyyən olunarsa, iş cinayət işinin başlanması üçün aidiyyəti üzrə Səbail Rayon Prokurorluğuna göndəriləcək.
İdarədən bildirilib ki, təsdiqlənməmiş məlumata görə, hadisəyə elektrik xətlərində qısaqapanma səbəb olub.
Məqalə müəllifi ilə əlaqə ünvanı news@trend.az
Bizi Twitter-dən izləyin @trend_az
Trend-in ən mühüm və maraqlı xəbərlərini "Telegram"da izləyin
