Azərbaycan, Bakı, 19 aprel /Trend, müxbir A.Hüseynbala/
Azərbaycan müxalifətinin ittifaqında təmsil olunan partiya rəhbəri hesab edir ki, parlament seçkilərində namizədlərin vahid siyahısı ilə iştirak etməyə bilərlər.
"Müsavat Partiyası ilə müzakirələr davam etdiyindən, seçkilərdə vahid siyahı ilə iştirakımız məsələsi də tam dəqiqləşdirilməyib", - bazar ertəsi Trend-ə Demokratiya Uğrunda İttifaqda (DUİ) təmsil olunan Böyük Azərbaycan Partiyasının (BAP) sədri Elşad Musayev bildirib.
Trend-in arayışı: Azərbaycanda parlament seçkilərinin 2010-cu ilin payızında keçiriləcəyi gözlənilir. Bundan əvvəlki seçkilər 2005-ci ilin noyabr ayında keçirilib. Azərbaycanda parlament seçkiləri majoritar sistem üzrə 125 seçki dairəsində keçirilir.
Musayevin sözlərinə görə, DUİ-nin Sədrlər Şurasının bu gün keçirilən iclasında da bu məsələ bir daha müzakirə olunub. "Biz Müsavatla müzakirələri davam etdirsək də, müxalifətin daha geniş tərkibdə və vahid siyahı ilə seçkilərdə iştirakını arzulayırıq. Müxalifətdaxili inteqrasiyanın genişləndirilməsi məqsədilə səylərimizi davam etdirəcəyik", - partiya sədri əlavə edib.
BAP sədri deyib ki, DUİ ilə Müsavat arasında aparılan məsləhətləşmələrdə deputatlığa namizədlərin siyahısı ilə bağlı müəyyən razılaşmalar əldə olunub. "Amma bu heç də o demək deyil ki, biz seçkilərdə vahid siyahı ilə iştirak edəcəyik. Hər şey müzakirələrin bundan sonrakı gedişindən asılıdır. Qarşılıqlı razılaşma əsasında DUİ və Müsavat Partiyası ümumi müzakirələr zamanı müəyyənləşdirilən iki siyahı ilə də seçkilərdə iştirak edə bilərlər", - Musayev vurğulayıb.
DUİ bir müddət əvvəl parlament seçkiləri ərəfəsi Müsavat və Azərbaycan Xalq Cəbhəsi partiyaları ilə birgə məsləhətləşmələrin aparılmasını təklif edib. Təkliflə razılaşdığından, DUİ-də təmsil olunanlarla Müsavat Partiyası rəhbərləri arasında artıq üç görüş keçirilib. AXCP isə təklifi qəbul etmədiyindən, məsləhətləşmələrdə iştirak etmir.
