Azərbaycan, Bakı, 10 iyun /Trend, müxbir T.Hacıyev/
Azərbaycanın "Yaşıllar" partiyası müxalifət blokuna qoşula bilər. Bu barədə Trend-ə partiyanın sədri Mais Güləliyev məlumat verib.
"Partiyanın öz xətti üzrə müstəqil şəkildə və ya hər hansı müxalifət blokuna qoşulmaqla seçkilərə qatılması baradə qərar İdarə Heyətinin iyunun axırında keçiriləcək iclasında veriləcək", - Güləliyev əlavə edib.
Partiya sədri bildirib ki, "Yaşıllar" partiyası parlament seçkilərində 10 nəfərin namizədliyini irəli sürməyi nəzərdə tutur.
"Namizədliyimizi əsasən Bakıda yerləşən dairələrdən irəli sürəcəyik. Çünki digər yerlərdə namizədlik irəli sürməyə hələ ki, imkanımız yoxdur", - Güləliyev bildirib.
Azərbaycanda parlament seçkilərinin 2010-cu ilin payızında keçiriləcəyi gözlənilir. Bundan əvvəlki seçkilər 2005-ci ilin noyabr ayında keçirilib. Azərbaycanda parlament seçkiləri majoritar sistem üzrə 125 seçki dairəsində keçirilir.
