Azərbaycan, Bakı, 31 avqust /Trend, müxbir Ü.Sadıqova/
Türkiyənin hakim Ədalət və İnkişaf Partiyasından (ƏİP) deputat Osman Coşqunun fikrincə, xalq sentyabrın 12-də keçiriləcək konstitusiyaya düzəlişlərin edilməsi üzrə referendumda ölkənin Əsas Qanununa düzəlişləri təsdiqləyəcək.
"Türkiyə xalqı referendumda konstitusiyadakı düzəlişlərə səs verəcək", - Coşqun Ankaradan telefonla Trend-ə bildirib.
Referendumun təşəbbüskarı olan hakim ƏİP-in deputatı hesab edir ki, ümumxalq səsverməsinin müsbət nəticələri Türkiyənin demokratikləşməsinə kömək edəcək və ölkədə insan haqlarının müdafiəsi ilə bağlı vəziyyətin yaxşılaşdırılmasına təkan verəcək.
Referenduma 1980-ci il dövlət çevrilişindən sonra qəbul edilən ölkənin Əsas Qanununun 29 maddəsini əhatə edən düzəlişlərin tam paketi çıxarılacaq.
Dəyişikliklər Prezidentin səlahiyyət müddətinin uzadılmasını, səlahiyyət müddəti başa çatan Prezidentin namizədliyini təkrar irəli sürməsini nəzərdə tutur; onlar eləcə də ombudsmanın fəaliyyətinə və siyasi partiyaların bağlanması prosesinin çətinləşdirilməsinə də aiddir. Konstitusiya dəyişikliklərinin başlıca məqsədi Türkiyənin gələcək demokratikləşməsinə yönəlib. Ölkə 2005-ci ildən tamhüquqlu üzv kimi Avropa İttifaqına daxil olmağa çalışır.
Lakin Türkiyə müxalifəti, hökuməti ölkə qanunvericiliyinə zidd referendum keçirməkdə günahlandırır. Müxalifət partiyaları bəyan edirlər ki, referenduma qanunun dərhal 29 maddəsini əhatə edən tam paket deyil, konstitusiyanın hər bir bəndi çıxarılmalıdır.
Türkiyə Parlamentinin üzvü Coşqun konstitusiyanın hər bir maddəsinin ayrı-ayrılıqda ümumxalq səsverməsinə çıxarılmasına ehtiyac görmür.
"Konstitusiyanın düzəlişlər paketini təşkil edən 29 maddənin hamısı bir-biri ilə bağlıdır və insan haqları müdafiəsini əngəlləyir", - deputat deyib. - "İddialara baxmayaraq, müxalifət konkret olaraq ayrılıqda referenduma nəyin çıxarılmasının zəruri olduğunu göstərmir".
Referenduma düzəlişlərin necə ediləcəyindən asılı olmayaraq, bu, Türkiyədə demokratikləşmə prosesini sürətləndirəcək və insan haqlarının müdafiəsi ilə bağlı vəziyyəti yaxşılaşdıracaq.
Başda Türkiyən Baş naziri Rəcəb Tayyib Ərdoğan olmaqla, ölkə rəhbərliyi mövcud konstitusiyaya ölkənin inkişafına maneə kimi baxır. Bundanəvvəlki koalision hökumətlərin Türkiyə Konstitusiyasının hərbi xuntanı müdafiə etməsinə dair bəyanatlarına baxmayaraq, indiyədək ölkənin Əsas Qanununda dəyişikliklər üçün ciddi addımlar atılmayıb.
