Kanada Şimali Avropanın hərbi təşəbbüsünə qoşulmaq üçün müraciət edib

Dünya xəbərləri Xəbər 17 Sentyabr 2026 02:36 (UTC +04:00)
Kanada Şimali Avropanın hərbi təşəbbüsünə qoşulmaq üçün müraciət edib

Bakı. Trend:

Kanada Şimali Avropa ölkələrinin daxil olduğu Birləşmiş Ekspedisiya Qüvvələrinə (Joint Expeditionary Force, JEF) üzv olmaq üçün müraciət edib.

Bu barədə Kanadanın Baş naziri Mark Karninin Liverpulda britaniyalı həmkarı Endi Bernemlə danışıqlarının yekunlarına əsasən Kanadanın Baş nazirinin ofisi məlumat yayıb.

“Onlar iki ölkənin müdafiə və təhlükəsizlik sahələrində dərinləşən və genişlənən tərəfdaşlığını qeyd edib, bu istiqamətdə səylərin gücləndirilməsi imkanlarını müzakirə ediblər. Bununla əlaqədar Baş nazir Karni Kanadanın Birləşmiş Ekspedisiya Qüvvələrinə qoşulmaq üçün rəsmi müraciət etdiyini açıqlayıb. O, Böyük Britaniyanın Kanadanın bu mühüm təşəbbüsdə iştirakını dəstəkləməsini alqışlayıb”, - deyə Baş nazirin ofisindən bildirilib.

Onun sözlərinə görə, baş nazirlər həmçinin Böyük Britaniya, İtaliya və Yaponiyanın birgə hazırladığı, radarlarda görünmə səviyyəsi aşağı olan altıncı nəsil qırıcı-bombardmançı təyyarənin yaradılması proqramının təqdim etdiyi “hərbi-sənaye əməkdaşlığı” imkanlarını nəzərdən keçiriblər. Ottava iyul ayında bu proqrama müşahidəçi qismində qoşulub.

Karni və Bernem Kanada ilə Böyük Britaniya arasında “iqtisadi əməkdaşlığın gücləndirilməsinin vacibliyini” vurğulayıb, süni intellekt sahəsindəki işləmələr də daxil olmaqla, qabaqcıl texnologiyalar üzrə qarşılıqlı fəaliyyəti genişləndirmək barədə razılığa gəliblər.

2014-cü ildə yaradılan JEF 10 ölkəni - Böyük Britaniya, Danimarka, İslandiya, Latviya, Litva, Niderland, Norveç, Finlandiya, İsveç və Estoniyanı birləşdirir. İştirakçı ölkələr vaxtaşırı birgə hərbi təlimlər keçirirlər. Bildirilir ki, onların məqsədi Şimali Avropa ölkələrinin silahlı qüvvələrinin böhran vəziyyətlərinə operativ reaksiya imkanlarını yaxşılaşdırmaqdır.

Məqalədə:

Xəbər lenti

Xəbər lenti