Bakı. Trend:
Kosovonun keçmiş prezidenti Haşim Taçi 1998–1999-cu illər müharibəsi zamanı törədilmiş hərbi cinayətlərə görə 25 il müddətinə azadlıqdan məhrum edilib.
Bu barədə Reuters və The Guardian məlumat yayıb.
Məhkəmə Taçini qətllərdə, işgəncələrdə və insanların qanunsuz olaraq saxlanılmasında təqsirli bilib, xüsusilə onun 96 nəfərin öldürülməsinə aidiyyəti olduğunu müəyyən edib.
Taçi Kosovonun müstəqilliyi uğrunda Serbiya qüvvələrinə qarşı döyüşən Kosovo Azadlıq Ordusunun rəhbərlərindən biri olub.
Kosovonun keçmiş prezidenti və Kosovo Azadlıq Ordusunun rəhbərlərindən biri Haşim Taçi 1998–1999-cu illər müharibəsi zamanı törədilmiş hərbi cinayətlərə görə 25 il müddətinə azadlıqdan məhrum edilib. 58 yaşlı siyasətçinin hökmü sentyabrın 16-da Haaqada yerləşən Kosovo üzrə İxtisaslaşdırılmış Palatalar tərəfindən elan olunub.
Məhkəmə Taçini, xüsusilə, qətllərdə, işgəncələrdə və insanların qanunsuz olaraq saxlanılmasında təqsirli bilib. Hökmə əsasən, o, Kosovo Azadlıq Ordusunun (QAO) rəhbərlərindən biri olduğu dövrdə törədilmiş cinayətlərə görə məsuliyyət daşıyıb.
Tribunalın qənaətinə görə, Taçi siyasi rəqiblər və Serbiya qüvvələri ilə əməkdaşlıq etməkdə şübhəli bilinən şəxslər də daxil olmaqla, 96 nəfərin öldürülməsinə aidiyyəti olub. Bundan əlavə, 385 nəfərin qanunsuz saxlanılması, 303 nəfərə işgəncə verilməsi və daha 49 nəfərlə qəddar rəftar edilməsi ilə bağlı ittihamlar da araşdırılıb. Məhkəmənin məlumatına görə, həmin şəxslər döyüş əməliyyatlarında fəal iştirak etməyiblər.
Taçi ona qarşı irəli sürülən ittihamları rədd edib. Prokurorluq onun 45 il müddətinə azadlıqdan məhrum edilməsini tələb edib. Müdafiə tərəfinin hökmü apellyasiya qaydasında mübahisələndirəcəyi gözlənilir.
1998–1999-cu illərdə əsasını etnik albanların təşkil etdiyi Kosovo Azadlıq Ordusu Kosovonun Serbiyadan ayrılması uğrunda Serbiya qüvvələrinə qarşı döyüşüb. Döyüşlər NATO-nun müdaxiləsindən sonra başa çatıb.
Münaqişə nəticəsində 10 mindən çox insan həlak olub. Ölənlərin əksəriyyətini etnik albanlar təşkil edib.
QAO-nun keçmiş üzvlərinin törətməkdə şübhəli bilindikləri cinayətlərin araşdırılması məqsədilə 2015-ci ildə Kosovo üzrə İxtisaslaşdırılmış Palatalar və İxtisaslaşdırılmış Prokurorluq yaradılıb. Məhkəmə Haaqada fəaliyyət göstərir.
Taçi və QAO-nun daha üç keçmiş rəhbəri — Kadri Veseli, Redjep Selimi və Yakup Krasniçi 2020-ci ilin noyabrında Haaqadakı istintaq təcridxanasına köçürülüblər. Məhkəmə prosesi 2023-cü ilin aprelində başlayıb. İşə baxılması zamanı məhkəmə 134 şahidi dinləyib, tərəflərin yekun çıxışları isə 2026-cı ilin fevralında səsləndirilib.
