Gürcüstan, Tbilisi, 4 sentyabr /Trend, müxbir N.Kirsxaliya/
Sentyabrın 6-da Amerika konqresmenlərinin nümayəndə heyəti konqresmen-demokrat (Corciya ştatı) Cim Marşalın rəhbərliyi altında Gürcüstana gələcək.
Səfər zamanı nümayəndə heyəti Gürcüstan Prezidenti Mixeil Saakaşvili, Parlamentin sədri David Bakradze, hökumət üzvləri, həmçinin, müxtəlif partiyaların nümayəndələri ilə görüşəcək. Bu barədə Trend-ə ABŞ-ın Gürcüstandakı Səfirliyindən bildiriblər.
Nümayəndə heyətinin tərkibinə konqresmen-demokratlar Ceyn Harman (Kaliforniya) və Piter Velç (Vermont), konqresmen-respublikaçılar Çarlz Dent (Pensilvani) və Sintiya Lumis (Vayominq) daxildirlər.
Görüşlərdə Gürcüstan-Amerika münasibətləri, Gürcüstanda mövcud siyasi proseslər və ABŞ-ın ölkədə iqtisadi islahatlara, həmçinin, Gürcüstanın Əfqanıstanda sülhməramlı əməliyyatlarda iştirakına dəstəyi müzakirə olunacaq.
