Azərbaycan, Bakı, 1 noyabr /Trend, müxbir Y.Ostapenko/
Avropa İttifaqının Azərbaycanda keçiriləcək parlament seçkilərində müşahidə missiyalarının rəhbərləri ATƏT-in Demokratik Təsisatlar və İnsan Haqları Bürosunun (DTİHB) seçkiqabağı kampaniyanın aparılması üzrə aralıq hesabatını dəstəkləyir. Bu barədə bazar ertəsi Aİ-nin dərc olunmuş press-relizində deyilir.
Onlar ümid edirlər ki, Azərbaycan hökuməti, məsul qurum kimi Mərkəzi Seçki Komissiyası hesabatlarda göstərilən bəzi bəndlərlə bağlı lazımi addımlar atacaq.
"Bu, Azərbaycana dünya ictimaiyyətinə siyasi islahatlara, müasirləşmə və demokratikləşmə yolu ilə irəliləməsinə sadiqliyini sübut etməyə imkan verərdi", - məlumatda qeyd olunub.
ATƏT DTİHB 16-26 oktyabr üçün ikinci aralıq hesabatını oktyabrın 30-da dərc edib. Hesabatda seçkiqabağı kampaniyanın həm müsbət tərəfləri, həm də bəzi pozuntular qeyd olunub.
Azərbaycanda parlament seçkiləri noyabrın 7-də keçiriləcək. Sentyabrın 3-də seçkilərə rəsmi start verilib.
Bundan əvvəlki seçkilər 2005-ci ilin noyabr ayında keçirilib. Azərbaycanda parlament seçkiləri majoritar sistem üzrə 125 seçki dairəsində aparılır.
Hazırda parlament seçkilərində iştirak etmək üçün 692 namizəd qeydə alınıb.
Seçkilərin ədalətli keçməsini ATƏT DTİHB, AŞ PA, MDB və GUAM missiyaları müşahidə edəcəklər. Aİ-dən DTİHB missiyasının tərkibinə daxil olacaq bir neçə müşahidəçilər qrupu, Avropa Parlamentinin, eləcə də Aİ-nin ayrı-ayrı üzv ölkələrindən nümayəndələr gələcək.
Hazırda seçkiləri izləyəcək 581 beynəlxalq müşahidəçi qeydə alınıb. Müşahidəçilərin ümumi sayı 20 min nəfəri ötür.
"Avropa İttifaqının missiyalarının rəhbərləri parlament seçkisinə hazırlıqla bağlı MSK və digər qurumların işini, xüsusilə də İctimai televiziyada və dövlət tərəfindən maliyyələşən qəzetlərdə pulsuz vaxt və yer ayrılması ilə bağlı MSK-nın qərarını alqışlayır", - məlumatda qeyd olunub.
"Seçkilərə bir neçə gün qalmış Aİ missiyalarının rəhbərləri aidiyyəti qurumları siyasi dialoq və plüralistik kampaniya mühitini bundan sonra da dəstəkləməyə çağırır. Onlar Azərbaycanın ATƏT və Aİ qarşısında öhdəliklərinin yerinə yetirilməsi üçün ona lazımi köməyi etməyə hazırdırlar", - məlumatda vurğulanır.
