Azərbaycan, Bakı, 2 noyabr /Trend, müxbir K.Zərbalıyeva/
Ədliyyə nazirinin müavini, Penitensiar Xidmətin rəisi, general-leytenant Nazim Ələkbərovun cəzaçəkmə müəssisələrində parlament seçkilərinin təşkili və keçirilməsi ilə bağlı Trend-ə müsahibəsi
- Azərbaycanın cəzaçəkmə müəssisələrində noyabrın 7-də keçiriləcək parlament seçkilərinə hazırlıq necə gedir? Seçkilərlə bağlı hazırlanmış tədbirlər planında nələr nəzərdə tutulub?
- 7 noyabr 2010-cu il tarixdə keçiriləcək Azərbaycan Respublikasının Milli Məclisinə seçkilərlə əlaqədar Penitensiar Xidmət üzrə xüsusi tədbirlər planı hazırlanıb və təsdiq edilib. Bu tədbirlərə cəzaçəkmə müəssisələrində, istintaq təcridxanalarında və hərbi qurumlarda fəaliyyət göstərəcək məntəqə seçki komissiyalarının təşkili üçün ərazi üzrə dairə seçki komissiyaları ilə sıx əməkdaşlıq, seçicilərin siyahılarının dəqiqləşdirilməsi, səsvermə üçün azadlıqdan məhrum edilmiş şəxslərin Mərkəzi Seçki Komissiyası tərəfindən təsdiq edilmiş formada xüsusi vəsiqələrlə təmin edilməsi, seçicilərin maarifləndirilməsi istiqamətində görüləcək işlər və eləcə də qanunvericiliklə müəyyən olunmuş müddət ərzində namizədlərin təbliğat kampaniyasına şərait yaradılması daxildir.
Seçkilərlə bağlı həyata keçiriləcək bütün tədbirlərin və tabe qurumlarda təşkil ediləcək seçki məntəqələrində seçkilərin gedişinin kütləvi informasiya vasitələrində işıqlandırılması əvvəllər olduğu kimi, bu dəfə də tam təmin olunacaq. Eyni zamanda, Penitensiar Xidmət üzrə parlament seçkilərinə hazırlığın gedişinə, tabe qurumlarda təşkil olunacaq seçki məntəqələrinin fəaliyyətinin təşkilinə və seçkilərin nəticələrinə dair məlumatlar Penitensiar Xidmətin internet səhifəsi vasitəsilə mütəmadi olaraq geniş ictimaiyyətə çatdırılacaq.
Artıq plan üzrə nəzərdə tutulmuş tədbirlərin icrasına başlanılıb və seçkilərə hazırlığın gedişi ilə bağlı oktyabrın 19-da Penitensiar Xidmətin Təlim Mərkəzində tabe qurumların və 18 saylı Nərimanov-Nizami DSK üzvlərinin iştirakı ilə treninq-seminar, oktyabrın 27-də isə Penitensiar Xidmətin baş idarəsində tabe qurumların rəhbər heyətinin iştirakı ilə geniş müşavirə keçirilib. Müşavirədə MSK-nın katibi Natiq Məmmədov da iştirak edib, toplantı iştirakçılarını maraqlandıran suallar cavablandırılıb.
- Cəzaçəkmə müəssisələrində neçə seçki məntəqəsinin yaradılması nəzərdə tutulub?
- Penitensiar Xidmətin tabeliyində olan qurumlar üzrə 23 seçki məntəqəsi yaradılacaq. Həmin məntəqə seçki komissiyaları 14 seçki dairəsini əhatə edir. Penitensiar Xidmət üzrə seçicilərin sayına gəldikdə isə, məhkumların sayının daim dəyişkənliyindən irəli gələrək bu say Seçki Məcəlləsinə uyğun olaraq seçkilərə qısa müddət qalan bir vaxtda penitensiar müəssisələrdə təşkil olunmuş məntəqə seçki komissiyaları tərəfindən dəqiqləşdirilir. Parlament seçkilərinin keçiriləcəyi günə qədər Seçki Məcəlləsinə uyğun olaraq Penitensiar Xidmətin tabeliyindəki müəssisələrdə saxlanılan səsvermə hüququ olan bütün şəxslərin seçkilərdə iştirakına tam şərait yaradılacaq.
- Cəzaçəkmə müəssisələrində namizədlərin təbliğatı məqsədilə hansı tədbirlər həyata keçirilir?
- Cəzaçəkmə müəssisələrində namizədlərin təbliğatı üçün seçki qanunvericiliyinə uyğun tam şərait yaradılıb. Belə ki, dairə seçki komissiyaları tərəfindən namizədlərin təbliği ilə bağlı təqdim edilən bütün materialların (platformalar, bukletlər və s.) müəssisələrin ərazisində yayımı təmin olunur. Eləcə də kütləvi informasiya vasitələri ilə məhkumların tanış olmalarına, xüsusilə də İctimai Televiziya ilə gedən namizədlərin debatlarının izlənilməsinə tam şərait yaradılır.
- Seçkilərdə müşahidəçi qismində iştirak edəcək şəxslər və kütləvi informasiya vasitələri nümayəndələrinin iştirakı üçün müvafiq şərait yaradılacaqmı?
- Milli Məclisə deputat seçkilərində müşahidəçi qismində iştirak edəcək şəxslərə veriləcək vəsiqələrin nümunələri artıq MSK-dan götürülüb və seçki məntəqələrinin təşkil olunacağı tabe qurumlara çatdırılıb.Əvvəlki illərdə olduğu kimi, cəzaçəkmə müəssisələrində təşkil olunacaq məntəqə seçki komissiyalarının, həmin ərazi üzrə dairə seçki komissiyaları üzvlərinin, müşahidəçilərin, eləcə də kütləvi informasiya vasitələri nümayəndələrinin seçkilər zamanı öz vəzifələrini yerinə yetirmələri üçün tam şərait yaradılacaq. Eyni zamanda, qeyd olunan şəxslərin cəzaçəkmə müəssisələrinə daxil olması və onların təhlükəsizliyinin təmin olunması üçün bütün zəruri tədbirlər görülüb.
Cəza çəkənlərin parlament seçkilərində azad seçim etmələri, tabe qurumlarda bu seçkilərin azad, şəffaf və demokratik keçirilməsi üçün bütün zəruri tədbirlər görülür və əvvəlki illərdə olduğu kimi, heç bir pozuntulara yol verilməyəcək.
