Azərbaycan, Bakı, 30 noyabr /Trend, müxbir T.Hacıyev/
Azərbaycanın müxalif Müsavat Partiyasının iki funksionerinin partiyadan uzaqlaşması onun fəaliyyətinə təsirsiz ötüşməyəcək. Bu barədə çərşənbə axşamı Trend-ə partiya rəhbərinin müavini Arzu Səmədbəyli bildirib.
"Bu adamların hər ikisi kifayət qədər tanınan və partiyanın həyatında rolu olan insanlardır. Təbii ki, onların partiyadan uzaqlaşması onun siyasi fəaliyyətinə təsirsiz ötüşməyəcək. Lakin partiya yenə də öz cari fəaliyyəti ilə məşğul olacaq", - Səmədbəyli əlavə edib.
Noyabrın 29-da Müsavat Partiyasının Məclis sədri Sülhəddin Əkbər tutduğu vəzifədən, Divan üzvü İbrahim İbrahimli isə partiya sıralarından istefa verib. Əkbər bu hərəkətini partiyanın strateji kursu ilə razılaşmamağı ilə əlaqələndirib. İbrahim İbrahimli partiya rəhbərliyinin ona etimad göstərmədiyini əsas gətirərək, partiya sıralarını tərk edib.
Səmədbəylinin sözlərinə görə, insanların partiyaya gəlib-getməsi normal haldır.
"Həmin şəxslərin partiyadan getməsinin partiyanın faliyyətinə göstərə biləcəyi təsir rəhbərliklə müzakirə ediləcək və müvafiq qərarlar qəbul olunacaq", - o, əlavə edib.
Müsavat Partiyası 1911-ci ilin oktyabrında Bakıda yaradılıb. 1920-ci ilin aprelində Azərbaycan Sovet qoşunları tərəfindən işğal olunduqdan sonra Müsavat Partiyasının fəaliyyəti məhdudlaşıb və gizli fəaliyyət göstərməyə başlayıb.
1992-ci ilin noyabrında Müsavat Partiyasının III Bərpa Qurultayı keçirilib. Partiya ideologiyasının əsasında müsavatçılıq, türkçülük, müasirlik, liberallıq ideyaları dayanır. Siyasi sistemdə mövqeyi sağ-mərkəzçidir.