Azərbaycan, Bakı, 3 dekabr /Trend, müxbir T.Hacıyev/
Azərbaycan Ali Məhkəməsində cümə günü müxalif Klassik Xalq Cəbhəsi Partiyasının (KXCP) sədri Mirmahmud Mirəlioğlunun şikayətinə baxılıb. Mirəlioğlunun Trend-ə verdiyi məlumata görə, məhkəmə noyabrın 29-da Apelyasiya Məhkəməsinin çıxardığı qərarı qüvvədə saxlayıb və onun iddiası təmin olunmayıb.
Mirəlioğlunun seçki günü baş verən pozuntularla bağlı 19 noyabr 2010-cu il tarixində MSK-ya ünvanladığı şikayət bu qurumun qutusundan yoxa çıxıb. MSK-da iddia edirlər ki, şikayət onlara gəlib çatmayıb. Mirəlioğlu məhkəməyə şikayəti poçt qurumuna təqdim etməsi barədə sənəd təqdim edib.
Mirəlioğlu 24 noyabr 2010-cu il tarixində yenidən MSK-ya müraciət edib və şikayətin qanunla müəyyən olunduğu müddətdə göndərildiyini, MSK-ya çatmamasında onun günahının olmadığını əsaslandırıb. Lakin MSK ərizəçinin 24 noyabr 2010-cu il tarixli ərizəsinə baxaraq qanunvericiliklə müəyyən olunmuş müddətin ötürüldüyü qənaətinə gəlib və müraciətə baxmadan geri qaytarıb.
Mirəlioğlunun verdiyi apelyasiya şikayətini Bakı Apelyasiya Məhkəməsi rədd edib.