Azərbaycan, Bakı, 29 dekabr /Trend, müxbir T. Hacıyev/
Məclisin gələcək fəaliyyəti ilə bağlı əlahiddə, fövqəladə bir planım yoxdur. Bunu çərşənbə günü Trend-ə Müsavat Partiyasının yeni seçilmiş Məclis sədri Arzu Səmədbəyli bildirib.
"Planım partiyanın fəaliyyət planında nəzərdə tutulan istiqamətdə olacaq. Məclis hansı işləri görməlidirsə, onları yerinə yetirəcəyik. Qurultaya hazırlıq üzrə Təşkilat Komitəsinin üzvü kimi fəaliyyətimizi davam etdirəcəyik", - Səmədbəyli əlavə edib.
Partiya Məclisinin bazar günü keçirilən toplantısında Səmədbəyli sədr seçilib. Ondan öncəki sədr Sülhəddin Əkbər partiya daxilindəki bəzi qüvvələrin AXCP-Müsavat birliyinə qarşı çıxmasına etiraz edərək tutduğu vəzifədən və partiyadan istefa vermişdi. Məclis Müsavatın qurultaydan sonra ən böyük kollegial qurumudur.
Səmədbəyli deyib ki, gələn il Müsavatın 100 illik yubileyinin keçirilməsi ilə bağlı həm ölkə daxilində, həm də xaricdə tədbirlər nəzərdə tutulub.
"Bu istiqamətdə işimizi quracağıq. Partiyanın digər strukturları ilə bir yerdə nəzərdə tutduğumuz fəaliyyəti yerinə yetirməyə çalışacağıq", - o, qeyd edib.
Səmədbəyli onu da bildirib ki, Məclis sədri kimi "İctimai Palata"nın fəaliyyətinin yaxşı təşkil olunması üçün kömək göstərəcək.
"Biz həm də 2011-ci ildə həm Palataya daxil olan qurumlarla, insanlarla, həm də xalqla bir yerdə ölkədə demokratik abu-havanın yaradılmasına çalışacağıq", - o, deyib.
Dekabrın 28-də bir sıra siyasi partiyaların, QHT-lərin və müstəqil şəxslərin iştirakı ilə "İctimai Palata" yaradılıb.
