Gürcüstan, Tbilisi, 28 mart /Trend, müxbir N.Kirsxaliya/
Gürcüstanın eks-prezidenti Eduard Şevardnadze ölkə hakimiyyətini Metsamor AES-in təhlükəsizliyinin təmin olunması ilə bağlı dərhal Ermənistanla danışıqlara başlamağa çağırıb. Ermənistanın atom elektrik stansiyasındakı vəziyyətə dair məlumat "ciddi narahatlıq doğurur". Trend-in məlumatına görə, bu barədə eks-prezident "Asaval-Dasavali" həftəliyinə müsahibəsində bildirib.
"Məlum olduğu kimi, Metsamor AES-də vəziyyət acınacaqlıdır. Orada heç bir təhlükəsizlik təminatı yoxdur və o, bütün bölgə üçün təhlükə yaradır", - eks-prezident deyib.
Eduard Şevardnadze hesab edir ki, belə bir vəziyyətdə Gürcüstan hakimiyyəti Ermənistanla danışıqlara başlamağa və gözlənilən fəlakətdən yayınmaq üçün əlindən gələni etməyə borcludur.
1976-cı ildə fəaliyyətə başlayan Metsamor AES Ermənistanın paytaxtı Yerevandan 30 kilometr qərbdə, seysmik cəhətdən fəal bölgədə yerləşir. 1988-ci ildə Spitakda baş vermiş dağıdıcı zəlzələdən sonra Ermənistan rəhbərliyi AES-in fəaliyyətini dayandırmaq qərarına gəlib. Lakin iqtisadi çətinliklər 1993-cü ildə rəsmi Yerevanı Metsamor AES-i yenidən işə salmağa vadar edib.