Gürcüstan, Tbilisi, 9 aprel /Trend, müxbir N.Kirsxaliya/
Gürcüstanda yaşayan azərbaycanlı tələbələr 9 apreldə həlak olan qəhrəmanların xatirəsini yad ediblər. Marneuli və Bolnisidən sonra həmrəylik aksiyası bu gün Qardabani və Rustavidə keçirilib. Tədbirdə regionda yaşayan azərbaycanlı gənclər iştirak ediblər.
Gənclərin nümayəndələri 9 aprel memorialına yürüş təşkil ediblər, əklillər qoyublar və həlak olanların xatirəsini bir dəqiqəlik sükutla yad ediblər.
Aksiyada məqsəd azərbaycanlı tələbələrə 1989-cu il 9 aprel tarixində nə baş verdiyini və bu günün Gürcüstan tarixində nə dərəcədə vacib olduğunu izah etməkdir. Trend-in məlumatına görə, bu barədə Gürcüstanın Azərbaycanlı Tələbələr Assosiasiyasının sədri Samirə İsmayılova bildirib.
"Bununla yanaşı, biz gürcü xalqına öz həmrəyliyimizi və Gürcüstandakı azərbaycanlıların gürcü xalqının ayrılmaz hissəsi olduğunu göstərmək istəyirik", - o deyib.
Həmrəylik aksiyası Gürcüstanın Gənclər və İdman Nazirliyinin dəstəyi ilə keçirilir. Aksiyalar silsiləsi sabah Tbilisidə başa çatacaq.