Azərbaycan, Bakı, 19 iyul /Trend/
Rusiya Cənubi Qafqazda iştirakı hərbidən iqtisadi konsepsiyaya dəyişməlidir. Azərbaycanın xarici işlər nazirinin müavini Araz Əzimov belə hesab edir.
Azərbaycan Rusiya hərbiçilərinin Ermənistan ərazisində olmasından narahatdır. Trend-in məlumatına görə, Əzimov "Exo Moskvı" radiostansiyasına müsahibəsində bildirib.
"Təəssüf ki, Rusiya Ermənistan ərazisində silahlı qüvvələrin saxlanmasını vacib hesab edir. Biz getdikcə RF-nin Cənubi Qafqazda iştirakı üçün belə hərbi konsepsiyaya daha az əsas görürük - tankları tankerlərlə əvəz etməyin, yəni hərbi formanı iqtisadi mövcudluqla əvəz etməyin vaxtı çatıb", - nazir müavini qeyd edib.
Əzimov hesab edir ki, Ermənistanı Dağlıq Qarabağ nizamlaması üzrə danışıqlarda səslənən konstruktiv təklifi qəbul etməyə inandırmaq Rusiyanın marağındadır.
İki Cənubi Qafqaz ölkəsi arasında münaqişə 1988-ci ildə Ermənistanın Azərbaycana qarşı ərazi iddiası irəli sürməsi zəminində yaranıb. Azərbaycan torpaqlarının iyirmi faizi, yəni Dağlıq Qarabağ ərazisi və bu əraziyə bitişik yeddi rayon Ermənistan Silahlı Qüvvələrinin işğalı altındadır. 1994-cü ildə tərəflər atəşkəs rejiminə dair razılaşma əldə ediblər və o vaxtdan bəri ATƏT-in Minsk qrupunun himayəsi altında, Rusiya, Fransa və ABŞ-ın həmsədrliyi ilə hələ də nəticəsiz sülh danışıqları aparılır.
BMT Təhlükəsizlik Şurasının Dağlıq Qarabağ və ətraf rayonların azad edilməsinə dair qəbul etdiyi dörd qətnaməni Ermənistan bu günə qədər yerinə yetirməyib.