Azərbaycan, Bakı, 1 fevral /Trend, müxbir M.Əliyev/
Azərbaycan Parlamenti bu gün "Dağınıq skleroz xəstəliyinə tutulmuş şəxslərə dövlət qayğısı haqqında" qanun layihəsini ikinci oxunuşda qəbul edib.
Trend-in məlumatına görə, qanun layihəsində dağınıq skleroz xəstələrinin müayinəsi, müalicəsi, profilaktikası, reabilitasiyası, sanatoriyalarla təmin olunması ilə bağlı dövlət proqramının hazırlanması qeyd olunub.
Millət vəkili Əhliman Əmiraslanov bildirib ki, dağınıq skleroz diaqnozu olan şəxslərin müalicəsi, bərpası olduqca bahadır və dövlət həmin xəstələrin müayinə və müalicəsinə vəsait ayırmaq iqtidarındadır.
Onun sözlərinə görə, dağınıq skleroz müalicəsi bahalı dərmanlar tələb edən, dünyada geniş yayılmış və insana çox əzab verən xəstəlikdir.
Xəstəlik insanın bütün orqan və toxumalarını zədələyir - görməsi, eşitməsi, nitqi, hərəkəti, koordinasiyası pozulur, əqli zəiflik baş verir və xroniki davam edir. Müalicəsi isə ildə 10-15 min manat xərc tələb edir.
Bu xəstəlik adətən insanlarda cavan yaşlarından (17-18 yaş) başlayır və onlar uzun müddət işləyə bilmirlər. Hazırda Azərbaycanda 10 min insan bu xəstəlikdən əziyyət çəkir.
Dağınıq sklerozun ilk əlaməti hərəkətin və koordinasiyanın pozulmasıdır - əllər, ayaqlar işləmir, sidik ifrazının norması pozulur. İnkişaf edəndən sonra xəstəliyin simptomları gözlərin bir tərəfə baxması, baş əsməsi, ağızın bir tərəfə əyilməsi, koordinasiyanın pozulması, nitqin itməsidir.
"Dağınıq skleroz xəstəliyinə tutulmuş şəxslərə dövlət qayğısı haqqında" qanun layihəsi ikinci oxunuşda qəbul edilib
Azərbaycan Parlamenti bu gün "Dağınıq skleroz xəstəliyinə tutulmuş şəxslərə dövlət qayğısı haqqında" qanun layihəsini ikinci oxunuşda qəbul edib.