Azərbaycan, Bakı, 14 fevral /Trend, müxbir E.Mehdiyev/
ATƏT-in Bakı ofisi ilə Azərbaycan Mərkəzi Seçki Komissiyası (MSK) arasında əməkdaşlıq perspektivləri müzakirə olunub.
Komissiyadan çərşənbə axşamı Trend-ə verilən məlumata görə, fevralın 14-də ATƏT-in Bakı ofisinin rəhbəri, səfir Koray Tarqay MSK-da sədr Məzahir Pənahovla görüşüb.
Səfiri Azərbaycanda fəaliyyətə başlaması münasibətilə təbrik edən MSK sədri qeyd edib ki, Komissiya nüfuzlu beynəlxalq qurumlarla, o cümlədən ATƏT ilə sıx əməkdaşlıq edir. Bu günədək MSK-nın Azərbaycanda keçirilmiş seçkilərlə bağlı ATƏT-in Bakı ofisi ilə birgə çeşidli layihələrə imza atdığını diqqətə çatdıran sədr, bu tədbirlərin seçki subyektlərinin maarifləndirilməsində böyük rol oynadığını qeyd edib.
ATƏT-in Bakı ofisinin rəhbəri də MSK ilə yüksəksəviyyəli əməkdaşlıqdan razı qaldığını qeyd edib. O bildirib ki, ATƏT-in Bakı ofisi MSK ilə əməkdaşlığın bundan sonra da davam etdirilməsindən məmnun olardı.
Görüşdə qarşılıqlı maraq doğuran məsələlər və gələcək əməkdaşlığın perspektivləri barədə fikir mübadiləsi də aparılıb.