Azərbaycan, Bakı, 13 sentyabr /Trend, müxbir E.Mehdiyev/
Hazırda Azərbaycan-İran münasibətləri normaldır. Bu münasibətlərin normallaşması artıq öz təzahürünü göstərir. Trend-in məlumatına görə, bunu cümə axşamı jurnalistlərə Azərbaycan Prezidenti Administrasiyasının İctimai-siyasi məsələlər şöbəsinin müdiri Əli Həsənov İran-Azərbaycan əməkdaşlığını şərh edərkən deyib.
"Keçmişdə, xüsusilə də "Eurovision" mahnı müsabiqəsi ərəfəsində İranın bəzi dairələrinin anti-Azərbaycan kampaniyası fonunda kəşkinləşmiş münasibətlər aradan qalxmaqdadır. Bu münasibətlərin normallaşması artıq öz təzahürünü göstərir", - Həsənov bildirib.
O qeyd edib ki, həm İran, həm də Azərbaycan ikitərəfli və çoxtərəfli münasibətləri bundan sonra da mehriban qonşuluq, dostluq, qarşılıqlı faydalı əməkdaşlıq prinsipləri üzərində davam etdirməyə hazır olduqlarını bəyan ediblər.