...

Baş Qərargah: Türkiyə SQ ölkədəki son siyasi hadisələrə qarışmır

Siyasət Materials 27 Dekabr 2013 14:02 (UTC +04:00)
Türkiyə Silahlı Qüvvələri (SQ) ölkədə baş verən son siyasi hadisələrə qarışmır.
Baş Qərargah: Türkiyə SQ ölkədəki son siyasi hadisələrə qarışmır

Azərbaycan, Bakı, 27 dekabr /Trend, müxbir R.Hafizoğlu/

Türkiyə Silahlı Qüvvələri (SQ) ölkədə baş verən son siyasi hadisələrə qarışmır. Bu barədə Trend cümə günü Türkiyə Baş Qərargahının saytına istinadən məlumat verir.

Məlumata görə, Türkiyə SQ ölkədəki hadisələri diqqətlə izləyir.

Xatırladaq ki, İstanbul və Ankarada keçirilmiş xüsusi əməliyyat nəticəsində 52 nəfər saxlanılmışdı. Saxlanılanlar arasında Türkiyənin hakim partiyasının üzvü olan bəzi nazirlərin övladları - iqtisadiyyat naziri Zəfər Çağlayanın oğlu Salih Kaan Çağlayan, daxili işlər naziri Müəmmər Gülərin oğlu Barış Gülər, şəhərsalma və ətraf mühit naziri Ərdoğan Bayraqdarın oğlu Oğuz Bayraqdar, həmçinin tanınmış iş adamlarından olan İstanbulun Fatih bələdiyyəsinin başçısı Mustafa Dəmir, Türkiyənin "Xalq Bank"ının baş direktoru Süleyman Aslan da olub. Bununla yanaşı, korrupsiya qalmaqalını araşdıran yüksək vəzifəli polis məmurları işdən azad edilib.

Həbslərə səbəb həmin şəxslərin korrupsiya, qaçaqmalçılıq və narkotik maddələrin satışında ittiham edilmələri olub. Həmçinin korrupsiya qalmaqalında iqtisadiyyat naziri Zəfər Çağlayan, Avropa İttifaqı işləri üzrə nazir Egemen Bağış, daxili işlər naziri Müəmmər Gülər və şəhərsalma və ətraf mühit naziri Ərdoğan Bayraqdarın adı hallanır.

Qeyd edək ki, bir neçə gün öncə Türkiyədə korrupsiya qalmaqalında adı hallanan Fatih bələdiyyəsinin sədri Mustafa Dəmir və saxlanılan iş adamı Əli Ağaoğlu həbsdən azad edilib. Həmçinin məhkəmənin qərarı ilə daxili işlər nazirinin oğlu Barış Gülər və iş adamı Rza Zərrab barəsində həbs qətimkan tədbiri seçilib. Məhkəmənin qərarı ilə həbs olunanlar arasında iqtisadiyyat naziri Zəfər Çağlayanın oğlu Salih Kaan Çağlayan da var.

Məqalədə:
Xəbər lenti

Xəbər lenti