Azərbaycan, Bakı, 29 may /Trend, müxbir İ.İzzət/
Mayın 29-da Azərbaycanın müdafiə naziri general-polkovnik Zakir Həsənovun rəhbərlik etdiyi nümayəndə heyətinin Gürcüstana rəsmi səfəri başlayıb.
Trend Azərbaycan Müdafiə Nazirliyinə istinadən məlumat verir ki, bu gün Gürcüstanın Müdafiə Nazirliyində general-polkovnik Z.Həsənovun Gürcüstanın müdafiə İrakli Alasaniya tərəfindən qarşılanma mərasimi keçirilib.
Protokola uyğun olaraq müdafiə nazirləri Fəxri qarovulun önündən keçiblər. Hər iki ölkənin dövlət himnləri səsləndikdən sonra müdafiə nazirlərinin görüşü keçirilib.
Görüşdə hərbi, hərbi-texniki, hərbi-təhsil sahəsində və ikitərəfli hərbi əməkdaşlığın perspektiv istiqamətlərinin müəyyənləşdirilməsi məsələləri müzakirə edilib.
Hər iki ölkənin müdafiə nazirləri kütləvi informasiya vasitələri qarşısında qısa brifinqlə çıxış ediblər.
Sonra müdafiə naziri general-polkovnik Z.Həsənovun rəhbərlik etdiyi nümayəndə heyəti Tbilisi şəhərindəki Qəhrəmanlar meydanında Gürcüstan dövlətinin azadlığı, ərazi bütövlüyü və müstəqilliyi uğrunda canlarından keçmiş qəhrəmanların xatirəsinə ucaldılmış abidə önünə əklil qoyub və onların əziz xatirəsini yad edib.
Səfər mayın 30-dək davam edəcək.