Azərbaycan, Bakı, 24 fevral /Trend, müxbir Ümid Niayeş/
İran və Azərbaycan Sərhəd Qoşunları komandanlarının Tehranda keçirilən 8-ci iclasında iki ölkə arasında bir neçə anlaşma memorandumu imzalanıb.
Trend-in "Mehr" agentliyinə istinadən verdiyi məlumata görə, sənədləri Azərbaycanın Sərhəd Qoşunları komandanı, general-polkovnik Elçin Quliyev və onun iranlı həmkarı general-mayor Qasım Rezayi imzalayıblar.
Q.Rezayi azərbaycanlı həmkarı ilə keçirdiyi görüşdə qaçaqmalçılıq, sərhəddən icazəsiz keçmə, qanunsuz ov və digər məsələləri müzakirə etdiyini bildirib. O deyib ki, tərəflər bu iclasların sərhəd bölgəsinə yaxın şəhərlərdə keçirilməsi məsələsi üzrə də razılığa gəliblər.
İranlı general İran-Azərbaycan sərhədlərinin ən təhlükəsiz sərhədlər olduğunu qeyd edib.
E.Quliyev İran Polis Qüvvələrinin baş komandiri İsmail Əhmədi Müqəddəm ilə də görüşüb və müzakirələr aparıb.
Trend-in "IRIB" agentliyinə istinadən verdiyi məlumata görə, İ.Ə.Müqəddəm terrorizm və narkotik qaçaqmalçılığı ilə mübarizənin iki ölkə üçün əhəmiyyətli olduğunu vurğulayıb.