Bakı. Elçin Mehdiyev – Trend:
Azərbaycanla Böyük Britaniya arasında münasibətlər strateji xarakter daşıyır.
Trend-in məlumatına görə, bunu "Senate Publishing" nəşriyyatının rəhbəri, Lordlar Palatasının üzvü Devid Evans Bakıda “Azərbaycan və Böyük Britaniya əməkdaşlığının 100 illiyi” kitabının təqdimat mərasimində deyib.
O qeyd edib ki, Azərbaycan Böyük Britaniyanın parlament dairələrində çox yaxşı tanınır.
D.Evansın sözlərinə görə, Azərbaycan-Böyük Britaniya əməkdaşlığı güclü ikitərəfli əlaqələrə, sabit, etibarlı tərəfdaşlığa və investisiyalara əsaslanır:
“Azərbaycanda 500 Böyük Britaniya şirkəti fəaliyyət göstərir. SOCAR ilə BP arasında imzalanmış “Əsrin müqaviləsi” Azərbaycanın zəngin enerji resurslarını dünyaya açdı və iqtisadiyyatın inkişafına mühüm töhfə verdi”.
Lord bildirib ki, Azərbaycan-Böyük Britaniya dostluğu hər iki tərəf üçün faydalıdır: "İki ölkə arasında maliyyə, təhsil, mədəni və digər sahələrdə də səmərəli əməkdaşlıq mövcuddur".