Bakı. Samir Əli - Trend:
Azərbaycan xalqı koronavirusla bağlı tətbiq edilən qadağalara ciddi riayət etməlidir. Bu virus adi xəstəlik deyil, çox təhlükəli və öldürücüdür. Bunu hər kəs dərk etməlidir.
Bunu Trend-ə açıqlamasında millət vəkili Elman Məmmədov deyib.
Onun sözlərinə görə, Azərbaycan dövləti əhalinin bu virusa yoluxmasının qarşısını almaq üçün bütün imkanlarından istifadə edir: "Atılan addımlar, verilən qərarlar hamısı bir məqsədə yönəlib - insanları qorumaq, əhalinin təhlükəsizliyini təmin etmək, bu bəladan qurtarmaq. Bu qərarlara hər bir vətəndaş məsuliyyətlə əməl etməlidir. Nə qədər qadağa tətbiq olunursa, həmin qadağalar insanların sağlamlığı, virusdan qorunması üçündür. Biz özümüz öz sağlamlığımızı qorumalıyıq. Kim ki, bu qadağalara məhəl qoymur, demək, o şəxs bu dünyada yaşamaq istəmir. Bu virus adi xəstəlik deyil, çox təhlükəli və öldürücüdür. Bunu hər kəs dərk etməlidir".
E.Məmmədov bildirib ki, bu virus bütün dünyanı əhatə edir: "Söhbət olum və ölümdən gedir. Dünyada baş verənlərə baxıb nəticə çıxarmalıyıq. Amerika Birləşmiş Ştatları, Çin, Hindistan, İspaniya, İtaliya kimi supergüc dövlətlər, dünyanın qoca qitəsi adlandırılan Avropa bu virus qarşısında diz çöküb. Bu dövlətlər koronavirus qarşısında hələ ki, acizdirlər. Azərbaycanda şükürlər olsun ki, qabaqlayıcı tədbirlərin görülməsi nəticəsində həmin dövlətlər kimi acınacaqlı vəziyyət yoxdur. Amma bu o demək deyil ki, biz arxayın olmalıyıq. Yaşlı insanlar evdən çıxmamalı, özlərini qorumalıdır, insanlar təmizliklərinə, sağlamlıqlarına və tətbiq edilən qadağalara məcburi riayət etməlidirlər. Virus ciddiyə alınmalıdır. Azərbaycanda bu virusun hələ ki, sürətlə yayılmasının qarşısı alınıb. Lakin virusun ölkədə yayılmaması üçün hamımız səfərbər olmalıyıq. Biz qaydalara riayət etməsək, koronavirus bizdə də geniş yayıla bilər. Ona görə də hər kəs bu virusdan yaxa qurtarmaq üçün özünü və yaxınlarını qorumalıdır. Buna nail olmaq üçün hər kəs qadalara ciddi şəkildə riayət etməlidir".
Xatırladaq ki, koronavirus (COVID-19) infeksiyasının Azərbaycan ərazisində geniş yayılmasının qarşısının alınması üzrə dövlət tərəfindən həyata keçirilən tədbirlər çərçivəsində insanların fərdi evlərində və mənzillərində, daimi və ya müvəqqəti yaşadıqları (olduqları) yerlərdə qalmaları tələb olunur.
Qeyd olunanlarla əlaqədar insanların həyat və fəaliyyəti üçün zəruri olan iş və xidmət sahələrindən başqa digər istiqamətlər üzrə fəaliyyət 2020-ci il 31 mart saat 00:00-dan 2020-ci il 20 aprel saat 00:00-dək dayandırılır.
Fərdi evlərdən və mənzillərdən insanların çıxışı - təxirəsalınmaz tibbi yardıma zərurət olduqda, həyat və sağlamlığa bilavasitə təhlükəli vəziyyət yarandıqda, fəaliyyətinə icazə verilən pərakəndə satış və əhaliyə xidmət göstərən obyektlərə getmək, məişət tullantılarının atılması hallarında, eləcə də xüsusi rejim dövründə fəaliyyət göstərən təşkilatlarda xidməti vəzifələrini icra etmək məqsədilə mümkündür.
İnsanların bir-biri ilə ünsiyyətini minimuma endirmək və bununla da infeksiyaya yoluxmanın sürətinin azaldılması məqsədilə bir sıra iş və xidmət sahələri üzrə fəaliyyət elan olunan müddətdə qadağan edilib.