Astana. Trend:
Prezident İlham Əliyevi və bütün Azərbaycan xalqını ərazi bütövlüyünün bərpası münasibətilə təbrik edirəm.
Trend cümə günü xəbər verir ki, bunu Qazaxıstanın Prezidenti Kasım-Jomart Tokayev Türk Dövlətləri Təşkilatının (TDT) dövlət başçılarının Astanada keçirilən 10-cu Zirvə Toplantısında deyib.
"Bu, tarixi hadisədir", - o deyib.
"Ölkəniz ərazi bütövlüyün bərpa etdi və yeni inkişaf dövrünə qədəm qoydu. Bu tarixi addım Birləşmiş Millətlər Təşkilatının (BMT) Nizamnaməsi və BMT Təhlükəsizlik Şurasının qətnaməsinə uyğun olaraq atılıb", - deyə o vurğulayıb.
Tokayev, həmçinin, hazırda təşkilat çərçivəsində artıq böyük işlərin görüldüyünü qeyd edib.
"Bizim konkret nailiyyətlərimiz var. Qazaxıstanın təşəbbüsü ilə yaradılmış Türkdilli Dövlətlərin Əməkdaşlıq Şurası (TDƏŞ) bu gün tamhüquqlu təşkilatdır. "Türk dünyası 2040 Vizyonu" adlı sənəd təsdiqlənib. Ən əsası, qardaş ölkələrin birliyini möhkəmləndirərək, ümumi dəyərlərimizə sadiqliyimizi bütün dünyaya nümayiş etdirdik. Biz əcdadlarımızın arzusunu yerinə yetirərək, türk dövlətlərinin əməkdaşlığını möhkəmləndiririk. Artıq məqsədimiz qarşılıqlı etimad və qardaşlığa əsaslanmış birliyimizi qorumaqdan və onu sonrakı nəsillərə ötürməkdən ibarətdir. Türk dünyası qlobal miqyasda qüdrətli dövlətlərlə eyni səviyyədə qarşılıqlı fəaliyyət göstərir. Artıq digər dövlətlər təşkilatımızın əsas istiqamətləri ilə hesablaşır. Bu səbəbdən, türk xalqları arasında qarşılıqlı əlaqələrin genişləndirilməsi hamımızın ümumi vəzifəsidir", - deyə Qazaxıstan prezidenti əlavə edib.
Xatırladaq ki, bu gün Qazaxıstanın paytaxtı Astanada Türk Dövlətləri Təşkilatının (TDT) 10-cu yubiley sammiti başlayıb.
Sammit çərçivəsində fövqəladə hallar və metrologiya sahəsində çoxtərəfli sənədlərin imzalanması gözlənilir. Bundan əlavə, TDT-nin nəqliyyat proqramının həyata keçirilməsi üzrə birgə fəaliyyət planı, həmçinin Astana Aktı və Astana Sammitinin Bəyannaməsi imzalanacaq.
Zirvə toplantısının sonunda TDT-yə sədrlik Özbəkistandan Qazaxıstana keçəcək.
2023-cü ildə Özbəkistan TDT-yə sədrlik edir. Sədrliyin başlanğıcı ötən ilin noyabrında “Türk sivilizasiyasının yeni dövrü: ortaq inkişaf və tərəqqiyə doğru” çağırışı altında keçirilən TDT sammiti olub.
(Tərcümə: Rəna Əbdürəhmanova)