"19 saylı Nərimanov birinci seçki dairəsindən namizədliyi qeydə alınmış bir qrup deputatlığa namizəd Azad və Ədalətli Seçki Uğrunda Birlik (AƏSUB) yaradıb". Bu barədə Trend agentliyinə "Azadlıq" seçki bloku üzrə həmin seçki dairəsindən namizədliyi qeydə alınan Müsavat Partiyası sədrinin müavini Sülhəddin Əkbər bildirib.
S.Əkbər qeyd edib ki, qurumu yaratmaqda məqsədləri seçki kampaniyası dövründə baş verən qanun pozuntularına qarşı birgə mübarizə aparmaq, təbliğat-təşvqat vasitələri və görüşlərin keçirilməsi ilə bağlı yaradılan süni maneələrlə razılaşmamaqdır.
Sənədi deputatlığa namizədlər Sülhəddin Əkbər, Vüqar Xasayev, Nemət Pənahlı, Müzəffər Baxışov, Elşad Musayev, Tahir Seyidlov, Vəli Allahverdiyev və Əli Mustafayev imzalayıblar.
S.Əkbər onu da bildirib ki, 19 saylı Nərimanov birinci seçki dairəsindən 29 şəxsin namizədliyi qeydə alınıb: "Bizim birliyin qapıları onların da üzünə açıqdır. Biz istərdik ki, həmin şəxslər də "AƏSUB"-də təmsil olunsunlar".
