Bu gün Axalkalakidən Rusiya hərbi texnikası və silahlarının növbəti eşelonu Zalqadakı dəmiryolu stansiyasını tərk edərək Azərbaycana yola düşüb. Hərbi sursat buradan daha sonra isə Rusiyaya aparılacaq.
Gürcüstanın Müdafiə Nazirliyindən Praym-Nyus agentliyindən verilən məlumata görə, texnikanın və sursatın çıxarılması Rusiyanın Axalkalakidəki hərbi bazasının demontajı çərçivəsində həyata keçirilir.
Trend in verdiyi məlumata görə, dəmiryolu platformasında ZİL markalı 21 yük maşını, 5 KAMAZ markalı maşın, iki QAZ-66 markalı maşın və döyüş mərmiləri yerləşdirilib.
Bu, Axalkalakidəki hərbi bazanı tərk edən sayca ikinci eşelondur. Birinci eşelon Gürcüstanı mayın 15-də tərk edib.
Texnika ilə dolu növbəti eşelon Rusiyaya Azərbaycandan mayın 25-də yola düşəcək.
Silahların və hərbi texnikanın çıxarılması Gürcüstan-Rusiya razılaşması əsasında həyata keçirilir.
Sənəd iki ölkənin nümayəndələri arasında 2006-cı il martın 31-də Soçidə imzalanıb.