Gəncə Qaz İstismar İdarəsinin bir neçə işçisi vəzifəsindən azad edilib. Bu barədə məlumatı Trend ə idarənin rəisi Ramiz İsmayılov verib.
Onun sözlərinə görə, işdən azad olunanların sayı 10-a çatıb. Onların arasında rəis müavini Cavad Məmmədov da var. Abunə şöbəsinin müdiri isə ayrı vəzifəyə təyin olunub. İsmayılov qeyd edib ki, işdən azad olunanlar işdə nöqsana yol verənlərdir. "Hazırda yenə işdən çıxmaq istəyənlər var. Lakin onlar mənimsədikləri pulları ödəməyincə idarə onları işindən azad etməyəcək. Əks təqdirdə onlar haqqında hüquq-mühafizə orqanlarına məlumat veriləcək" - deyən R.İsmayılov bildirdi ki, yanvar ayından bu günə kimi abuneçilər idarəyə 7 milyon manat pul borcludurlar. Hazırda qazları kəsilən abunəçilərin isə 770816 manat borcları var.
