Cari ildə Naxçıvan MR-də 150 ha sahədə meşəsalma işləri aparılıb. Trend in Naxçıvan Bürosunun məlumatına görə, Naxçıvan MR Ekologiya və Təbii Sərvətlər Nazirliyi tərəfindən hazırlanılmış son dislokasiya planına əsasən bu il həm də 85 ha ərazidə meşə bərpası, 8 ha sahədə isə toxum səpini və qələmçilik kökləndirilməsi işləri həyata keçirilib.
Ötən ildə isə meşəsalma, bərpa və ting bazasının yaradılması müvafiq olaraq 130 ha, 68 ha, 300 ha ərazidə baş tutub. Bundan əlavə Naxçıvan MR Ekologiya və Təbii Sərvətlər Nazirliyinin tədbirlər planına uyğun olaraq regionda ictimai işlərə kömək göstərilməsi məqsədilə "Ağacların əkilmə qaydaları"--texniki vəsait tərtib edilərək müvafiq təşkilatlara paylanılıb.
Məlumat üçün deyək ki, ölkə ərazisinin 12,5%-ni, kəskin kontinental iqlim şəraiti olan Naxçvan MR ərazisinin 1%-ə qədərini meşələr təşkil edir. Regionda ekoloji tarazlığın bərpası istiqamətində tədbirlər isə Naxçıvan MR Ali Məclisi sədrinin imzaladığı 01 mart 2001-ci il tarixli müvafiq sərəncama əsasən hər il yaz və payız aylarında həyata keçirilir.
