Azərbaycanın Avropa Şurası Parlament Assambleyasındakı (AŞ PA) nümayəndə heyətinin üzvü, millət vəkili Rafael Hüseynovun qurumun katibliyinə təqdim etdiyi daha bir sənəd çap olunub. Bu barədə Trend ə açıqlamasında Rafael Hüseynov bildirib.
Onun sözlərinə görə, bu sənəd "Azərbaycanın ərazi bütövlüyü və mədəni irs: Ermənistanın yeni təhlükələri" adlanır. R.Hüseynov qeyd edib ki, bu sənədlə bağlı AŞ PA-nın Nazirlər Komitəsinə təqdim etdiyi yazılı sorğu da işıq üzü görüb.
"Sənəddə göstərilir ki, Ermənistan işğal etdiyi əraziləri xarabalığa çevirməkdən, ekoloji tarazlığı pozmaqdan, işğal altında olan ərazilərdəki meşə örtüklərini, müasir mədəni sərvətləri dağıtmaqdan əl çəkmir və bu istiqamətdəki fəaliyyətini genişləndirmək istiqamətində addımlar atır. Sənəddə göstərilir ki, islam dininin Azərbaycana gəlişinə qədər ölkə əhalisinin müəyyən hissəsi xristian dininə məxsus olub. Ona görə də Azərbaycan ərazisinin ən müxtəlif yerlərində çoxlu xristian abidləri, kilsələr, üzərinə xaç işarəsi olan tikililər var. Ermənistan işğal altında olan ərazilərdə bütün bu xristian abidələrini özününküləşdirməyə çalışır və bacardığı qədər bunu edib. Sənəddə bildirilir ki, Ermənistanın növbəti hədəfi Naxçıvandır. Oradakı xristian abidələrini ermənilər özlərinə çıxmaqla yanaşı, Naxçıvana qarşı müəyyən ərazi iddiaları ilə çıxış edirlər, bu torpaqları zəbt etmək üçün yeni məkrli plan hazırlayırlar. Bunun üçün Ermənitanda həm hərbi, həm də təbliğati sturukturlar yaradılaraq fəaliyyət göstərir", - deyə
Rafael Hüseynov qeyd edib.
Millət vəkili deyib ki, Avropa Şurasının Nazirlər Komitəsindən Ermənistanın yeni işğal planlarının qarşısını almaqla bağlı tədbirlər görülməsi üçün təcili müzakirələr təşkil etmək istənilir.
R.Hüseynovun təqdim etdiyi sənəddə AŞ PA-nın Dağlıq Qarabağ münaqişəsi ilə bağlı qəbul etdiyi 1416 saylı qətnamə xatırladılır və qeyd olunur ki, həmin sənəd birmənalı olaraq Ermənistanı təcavüzkar adlandırır: "Təcavüzkar Ermənistanın yeni işğal planları həm Naxçıvana, həm də atəşkəsin tez-tez pozulduğu Qazax rayonuna yönəlib. Digər tərəfdən ermənilər Azərbaycanın mədəni irsinin yeni qatlarını ələ keçirmək, dağıtmaq üçün planlar hazırlayırlar."
