Azərbaycan, Bakı /müxbir Trend S.İlhamqızı/"Azadlıq" blokunun həmsədrləri ADP lideri Rəsul Quliyevin onlara göndərdiyi məktuba irəli sürdüyü təklifləri məqbul hesab etməyəcək. Bu barədə blokun həmsədri, Vətəndaş və İnkişaf Partiyasının sədri Əli Əliyev açıqlama verib.
Əli Əliyev bildirib ki, Rəsul Quliyev blokun həmtəsisçilərinin hər birinə ayrılıqda məktub göndərib. Məktubda R.Quliyev ADP daxilində baş verən hadisələrə, həmçinin müxalifətdaxili münasibətlərə dair öz fikirlərini yazıb, bəzi təkliflər verib. Ə.Əliyevin sözlərinə görə, "Azadlıq" blokunun növbəti iclasında bu məsələ müzakirəyə çıxarılacaq.
"Mənim fikrimcə, Rəsul Quliyevin müxalifətin təşkilatlanması, gələcək fəaliyyəti ilə bağlı təklif etdiyi mexanizmlər müxalifətə uğur gətirməyəcək. Ona görə də mən hesab edirəm ki, onun müraciətindən sonra "Azadlıq" blokunun mövqeyində dəyişiklik baş verməyəcək", deyə Ə.Əliyev qeyd edib.
