Azərbaycan, Bakı /müxbir Trend S.İlhamqızı/Müxalifət partiyalarının yeni yaradılacaq İttifaqında "Azadlıq" blokuna daxil olan partiyalar və Müsavat Partiyası təmsil olunmayacaq. Bu barədə Azadlıq Partiyanın sədri Əhməd Oruc məlumat verib.
O, bildirib ki, Klassik Xalq Cəbhəsi Partiyasının (KXCP) sədri Mirmahmud Mirəlioğlunun müxalifətin yeni ittifaqının yaradılması təşəbbüsü ilə bağlı bütün partiyalara müraciət göndərib: "Biz də bu təklifi irəli sürənlərdən biriyik. Lakin bir sıra partiyalar öz maddi və şəxsi maraqları üzündən müxalifətin birliyinin tərəfdarı deyillər. "Azadlıq" blokuna daxil olan partiyalar və Müsavat Partiyası öz münasibətləri ilə müxalifətin bir araya gəlməsində maraqlı olmadıqlarını nümayiş etdirdilər. Çünki onlar beynəlxalq qurumlardan aldıqları qrantların bütün müxalifət arasında bölüşməsini istəmirlər", deyə Ə.Oruc qeyd edib.
O, həmçinin əlavə edib ki, yeni yaradılacaq İttifaqa adları çəkilən iri partiyalar özləri maraq göstərmədiyindən qurum onların iştirakı olmadan yaradılacaq. Ə.Orucun sözlərinə görə, hazırda yeni İttifaqda təmsil olunmağa razılıq verən partiyalar Azərbaycan Milli İstiqlal, Milli Demokrat, Azadlıq və Klassik Xalq Cəbhəsi partiyalarıdır.