Azərbaycan, Bakı, 17 mart / Trend , müxbir S.İlhamqızı/ Azərbaycan Mətubat Şurasının üzvləri "Azadlıq" qəzetinin müxbiri Aqil Xəlilin bıçaqlanması faktı ilə əlaqədar daxili işlər naziri Ramil Usubovla görüşmək üçün müraciət edəcəklər. Bu barədə Trend ə Mətbuat Şurasının üzvü, "Yeni Nəsil" Jurnalistlər Birliyinin sədri Arif Əliyev məlumat verib.
Bu gün Redaktorlar Birliyinin son bir ildə ilk iclası keçirilib. Toplantıda müxbirin bıçaqlanması faktı ilə bağlı qurumun mövqeyini ifadə edən bəyanat qəbul edilib.
Redaktorlar hesab edirlər ki, bu hadisənin arxasında vahid bir idarəçilik dayanır.
Bəyanatda Aqil Xəlilin sağalması üçün bütün lazımi tədbirlərin görülməsi və günahkarların tapılaraq cəzalandırılması tələb olunur.
Redaktorlar həmçinin qərara alıblar ki, bu hadisə, cinayətlə bağlı aparılan istintaqla əlaqədar Mətubat Şurasının nümayəndələri daxili işlər naziri ilə görüşsünlər. Görüş üçün bu gün müraciət olunması nəzərdə tutulur.
Martın 13-də saat 20.00 radələrində "Azadlıq" qəzetinin müxbiri Aqil Xəlilə ürək nahiyəsindən bıçaq zərbəsi vurulub. Müxbir Klinik Tibbi Mərkəzə aparılıb və cərrahiyyə əməliyyatı olunub.
Faktla bağlı Cinayət Məcəlləsinin qəsdən sağlamlığa yüngül zərər vurma (128-ci maddə) maddəsi ilə cinayət işi başlanılıb, cinayətin motivi hələlik bəlli deyil və istintaq Bakı Şəhər Baş Polis İdarəsi tərəfindən aparılır.
Mətbuat Şurasının sədri Əflatun Amaşov isə Trend ə açıqlamasında bildirib ki, bu gün Daxili İşlər Nazirliyinin və Baş Prokurorluğun rəhbərliyi ilə əlaqə saxlayıb, cinayətin istintaqı ilə maraqlanıb.
"Mənə bildirdilər ki, hadisənin istintaqı şəxsən daxili işlər naziri Ramil Usubovun və baş prokuror Zakir Qaralovun nəzarəti altındadır. Mənim fikrimcə, araşdırmalar müsbət n6əticəsini verəcək və cinayətkarlar tapılaraq cəzalandırılacaq. Yaxın zamanlarda isə mətbuata dövlət dəstəyini nəzərdə tutuan konsepsiya qəbul ediləcək"-deyə Amaşov bildirib.
