Azərbaycan, Bakı, 17 mart/ Trend , müxbir C.Babayeva/ Bazar ertəsi Bakıda Ümumdünya Azərbaycan Gəncləri Konqresinin təqdimatı keçirilib. Konqres fevralın 13-də yaradılıb.
Konqresin sədri və həmtəsisçilərindən biri Rəşad Xasayoğlunun sözlərinə görə, Konqresin məqsədi bütün dünyadakı azərbaycanlı gənclərin ümummilli problemlərin ətrafında birləşdirilməsi, onların hüquqlarının müdafiəsi, Azərbaycan reallıqlarının dünya ictimaiyyətinin diqqətinə çatdırılması, gənclərin yardımı ilə Azərbaycanın diaspor təşkilatlarının fəaliyyətinin gücləndirilməsidir.
Xasayoğlunun sözlərinə görə, Konqresin əsas fəaliyyət istiqaməti bütün dünyada Azərbaycan gənclərinin fəaliyyətinin koordinasiya edilməsi olacaq.
Konqresin təşəbbüs ölkələri artıq dünyanın 20 ölkəsində - Danimarka, Türkiyə, Estoniya, Ukrayna, Kanada, ABŞ və digər ölkələrdə yaradılıb.
"Konqres Xaricdə Yaşayan Azərbaycanlılarla İş üzrə Dövlət Komitəsi, Heydər Əliyev Fondu, Mədəniyyət və Turizm, Gənclər və İdman və digər dövlət müəssisələri ilə əməkdaşlıq etməyi planlaşdırır"- sədr qeyd edib.
Konqresin 2008-2009-cu illər üçün fəaliyyət planına dünyanın aparıcı ölkələrinin gənclər təşkilatları ilə əməkdaşlıq, Dağlıq-Qarabağ reallıqlarının dünya ictimaiyyətinin diqqətinə çatdırılması daxildir.
Xasayoğlu Konqresin birinci qurultayının bu ilin sentyabrınadək Avropa ölkələrindən birində keçiriləcəyini bildirib.
