Azərbaycan, Bakı, 19 mart / Trend , müxbir S.İlhamqızı/ Hüquq Müdafiəçiləri Monitorinq Komitəsinin üzvləri Arzu Abdullayeva, Səidə Qocamanlı, Novella Cəfəroğlu və Səadət Bənənyarlı hesab edirlər ki, martın 18-də prezident tərəfindən verilmiş Əfv Fərmanında jurnalistlərin və xəstə məhbusların yer almaması Azərbaycanın imicinə zərbədir.
"Martın 13-də Avropa Şurasında büronun iclası oldu və Azərbaycan iqtidarı üçün əlverişli şarəit yarandı ki, Novruz bayramı ərəfəsində jurnalistləri və xəstə məhbusları azadlığa buraxsın. Lakin hakimiyyət bu dəfə də şansdan yararlanmadı" -deyə hüquq müdafiəçilərinin birgə bəyanatında bildirilir.
Hüquq müdafiəçiləri qeyd ediblər ki, Ermənistanda prezident seçkiləri böyük saxtakarlıqlar və insan haqlarının pozulması ilə baş verib, Gürcüstanda da seçkilər zamanı pozuntular müşahidə olunub. Onların fikrincə, bu faktlar AŞPA-da fövqəladə müzakirələrin keçirilməsinə səbəb ola bilər.
"Azərbaycan hökumətinin əlində daha böyük şans vardı ki, məhz belə bir vəziyyətdən öz xeyrinə istifadə edib, jurnalistləri və xəstə məhbusları azad etməklə, ölkəmizin adının müsbət mənada hallandırılmasına imkan yaratsın. Bu da baş vermədi. Nəticədə, AŞPA insan haqlarının pozulması sahəsində hər üç ölkədə tarazlaşma siyasəti aparmaq məcburiyyətində qalacaq"-deyə hüquq müdafiəçiləri bildirirlər.
Hüquq müdafiəçiləri məsələyə aydınlıq gətirmək üçün ölkə başçısına müraciət ediblər. Onlar bildiriblər ki, hər dəfə AŞPA sessiyasında Azərbaycanla bağlı mübahisəli məsələ həll olunanda, Azərbaycanda siyasi fiqurlar, jurnalistlər həbs olunur, təzyiqlərə məruz qalır və bu, təsadüf sayıla bilməz. Həm Azərbaycan, həm də beynəlxalq ictimaiyyət bu hadisələri iqtidarın apardığı siyasətlə bağlayır, lakin bu fikrin formalaşmaması üçün iqtidarın əlində imkan var ki, jurnalistləri və xəstə məhbusları həbsdən azad etsin.
