Azərbaycan, Bakı, 25 aprel / Trend , müxbir K.Zərbalıyeva/ Bakının Sabunçu rayonu ərazisindəki "4-cü mədən" adlanan ərazidə qanunsuz inşa olunmuş evlərin sökülməsi təxirə düşüb.
Həmin ünvanda yaşayan Teymur Kərimovun cümə günü Trend a verdiyi məlumata görə, Azərbaycan Dövlət Neft Şirkəti (ARDNŞ) rəhbərliyi onlara evlərin söküntüsünün dayandırıldığını bildirib.
Sabunçu rayon məhkəməsi "Balaxanıneft" Neft-Qaz Çıxarma İdarəsinin iddiası əsasında ərazidə 25 evin sökülməsi barədə qərar qəbul edib. Ərazidə yerləşən yüzlərlə evin sahibinə isə aprelin 24-də evləri boşaltmaq barədə bildiriş paylanıb.
Kərimovun verdiyi məlumata görə ARDNŞ rəhbərliyi iki halda evlərin söküləcəyi barədə onlara xəbərdarlıq edib. Belə ki, geoloqlardan ibarət qrup ərazidə təhqiqat aparacaq. Neft çıxma ehtimalı olan ərazidə, buruqların yaxınlığında və neft kəmərindən 100 metr az məsafədə yerləşən evlər söküləcək.
Həmin ünvanda yerləşən evlərin söküləcəyi halda ev sahiblərinə kompensasiya verilməsi nəzərdə tutulmur.
Məqalənin müəllifi ilə [email protected] ünvanı ilə əlaqə saxlaya bilərsiniz