Azərbaycan, Bakı, 05 may / Trend , müxbir Q.Cəbiyev/ Azərbaycanın Müəllif Hüquqları üzrə Dövlət Agentliyi ölkədə piratçılıqla mübarizəni gücləndirmək məqsədilə iki yeni qanun layihəsi hazırlayıb. Bu barədə Trend -a şənbə günü Dövlət Agentliyinin direktoru Abutalıb Səmədov bildirib.
Azərbaycanda əqli mülkiyyət bazarında hüquq pozuntularının aşkar edilməsi və onların qarşısının alınması məqsədi ilə agentliyin rəhbərliyi tərəfindən keçən il monitorinq qrupu yaradılıb. Həmin qrup mütəmadi olaraq əqli mülkiyyət məhsulları bazarında monitorinq-baxışlar keçirir. Keçirilən monitorinq-baxışlarda iştirak etmək üçün hüquq sahibləri dəvət olunur. Əqli mülkiyyət məhsulları bazarında monitorinq-baxışlar iki istiqamətdə, audio-video kaset, CD, DVD-lərin və kitab, xəritə əqli mülkiyyət məhsullarının istehsal və yayımını həyata keçirən obyektlər üzrə təşkil edilir.
Səmədov deyib ki, Müəllif Hüquqları Agentliyi piratçılıqla mübarizəni gücləndirmək üçün "Əqli mülkiyyət hüquqlarının təminatı və piratçılıqla mübarizə haqqında" və "Rəqəmli şəbəkədə yayım təşkilatlarının hüquqlarının qorunması haqqında" qanun layihələrini hazırlayaraq baxılmaq üçün Nazirlər Kabinetinə təqdim edib. Bundan başqa "Müəlliflik hüququ və əlaqəli hüquqlar haqqında" qanuna dəyişikliklər və əlavələr edilməsi barədə" qanun layihəsinə isə hazırda Milli Məclisdə baxılır. Səmədov hesab edir ki, yeni qanun layihələrinin qəbulu Azərbaycanda həm piratçılığın səviyyəsinin əhəmiyyətli dərəcədə aşağı düşməsinə kömək edəcək, həm də ümumilikdə əqli mülkiyyət sahəsinin inkişafına təkan verəcək.
Məqalə müəllifi ilə əlaqə ünvanı: [email protected]