Azərbaycan, Bakı,05 may / Trend , müxbir K. Zərbalıyeva/ Bakının Xətai rayon məhkəməsində Seçki Monitorinq Mərkəzinin qeydiyyatının ləğvi barədə Ədliyyə Nazirliyinin iddiası üzrə hazırlıq iclası keçirilib.
SMM-in icraçı direktoru Anar Məmmədli bazar ertəsi Trend a bildirib ki, prosesdə cavabdehin nümayəndəsi İntiqam Əliyev vəsatət verərək iddia ərizəsinin düzgün hazırlanmadığı və əsassız olduğu üçün icraata qəbul olunmamasını xahiş edib.
Vəsatət təmin olunmayıb və məhkəmə baxışı mayın 8-nə təyin olunub.
Ədliyyə Nazirliyinin Qeydiyyat və Notariat Baş İdarəsi Xətai rayon məhkəməsinə müraciət edərək təşkilatın qeydiyyatının etibarsız hesab edilməsi və ləğv olunması üçün müraciət edib. Mayın 5-də iddia ilə bağlı hazırlıq iclası keçiriləcək.
SMM ilk dəfə 14 mart 2006-cı ildə qeydiyyata alınması üçün təsis sənədlərini Ədliyyə Nazirliyinə təqdim edib.
Nazirliyin müvafiq idarəsi texniki bəhanələr gətirərək təsis sənədlərini qeydiyyata almayıb və SMM-in dövlət qeydiyyatına alınmaq üçün müraciətindən 5 dəfə imtina olunub.
Bu ilin fevralında isə SMM dövlət qeydiyyatına alınıb.
Nazirlik SMM-in qeydiyyatının ləğvi barədə iddiasını təşkilatın təsis sənədlərində təsisçilər barəsindəki məlumatların qeyri-müəyyən olması, təşkilatın hüquqi ünvanının dəyişdirilməsi barədə məlumatın nazirliyə bildirilməməsi, SMM-in Azərbaycanın 8 şəhərində yerləşən nümayəndəlikləri barədə məlumatların dövlət reyestrinə daxil edilməməsi ilə əsaslandırıb.
Təşkilatın həmtəsisçisi Məmmədli bildirib ki, Ədliyyə Nazirliyinin göstərdiyi məsələlər SMM-in qeydiyyatının etibarsız hesab edilməsi və ləğv edilməsi üçün əsas ola bilməz.
Müəlliflə əlaqə saxlamaq üçün elektron ünvan - [email protected]
