Azərbaycan, Bakı, 14 may /müx.TrendLife Şahin Cavadsoy/
Qalmaqallardan kənar olmağa çalışan müğənni Elnarə, həvəsdi-bəsdi deyib, kamera önünə keçməyə hazırlaşır. TrendLife-a danışan E.Xəlilova söyləyir ki, bir-birinin ardınca iki mahnısına klip çəkdirməyi düşünür: "Birinci növbədə "Lay-lay" mahnıma ekran həyatı verməyi planlaşdırmışıq. Çünki bu bəstə xronoloji ardıcıllığa baxsaq, daha əvvəl yaranıb. Yəni "Lay-lay"da toyumuzdan görüntülər, hamiləlik anlarındakı fotosessiyalar və ən əsası uşağımın dünyaya gəlməsi vaxtında çəkilən kadrlar yer alacaq. Bunun ardınca isə sözləri İsmayıl Dadaşova, musiqisi Ağaxanlıya aid olan "Ömrüm-günüm sizin hər an" mahnıma klip çəkdirmək fikrindəyəm. Sanki şair bu sözləri mənim həyatıma baxıb yazıb. Sözsüz ki, çəkiləcək ekran işini həm həyat yoldaşıma, həm övladıma, həm də canım qədər əziz olan pərəstişkarlara həsr edləcəyəm".
Solo-konsert arzularından da bəhs edən müğənni, hələlik belə bir fikri olmadığını açıq şəkildə etiraf etdi: "Yaxınlarda solo-konsert proqramı ilə çıxış edəcəyim gözlənilməsə də çox istəyirəm dinləyicilərimi bir araya yığım. Yəqin ki, Tanrım bu sevinci dadmağı da mənə yaşadar".