Azərbaycan, Naxçıvan. 27 may / Trend , müxbir E.Məmmədov/ Azərbaycan Milli Elmlər Akademiyasının Naxçıvan Bölməsindən verilən məlumatda qeyd olunub ki, muxtar respublikada folklorun tədqiqi və təbliği işini sürətləndsirmək və sistemləşdirmək üçün xüsusi proqram hazırlanıb. Bunun üçün AMEA Naxçıvan Bölməsinin İncəsənət, Dil və Ədəbiyyat İnstitutu təkliflər paketi hazırlayıb və Naxçıvan MR Ali Məclisinə təqdim edib.
Təkliflər paketində göstərilir ki, Naxçıvanda folklorun tədqiqi və təbliği üçün AMEA Naxçıvan Bölməsi bölgələrə ekspedisiyaların təşklini həyata keçirməli, Naxçıvan Dövlət Universiteti və Naxçıvan Özəl Universiteti tələbələrinin bölgələrə folklor təcrübəsinə yollanmasını təşkil etməlidir.
Bundan əlavə Naxçıvandan olan görkəmli folklorşünasların elmi əsərlərinin və toplanmış nümunələr əsasında folklor külliyatlarının çap olunması, 2 cildlik "Naxçıvan folkloru antologiyası"nın nəşr edilməsi, muxtar respublikanın rayonlarında folklor ansambllarının yaradılması və ildə bir dəfə Naxçıvan şəhərində folklor festivalının keçirilməsi, Naxçıvan MR Aşıqlar Birliyinin bərpa edilməsi, Naxçıvan folklor atlasının hazırlanması, Naxçıvanla bağlı saz havalarının tədqiqi və təbliğinin genişləndirilməsi nəzərdə tutulub.
Təkliflər paketində göstərilir ki, xalq yaradıcılığı ilə bağlı qədim musiqi alətlərinin inkişaf etdirilməsi və xalq yaradıcılığını əks etdirən qədim milli rəqslərin təbliğinin genişləndirilməsi də qarşıya qoyulan məqsədlərdəndir.
