Azərbaycan, Bakı, 19 iyun / Trend , müxbir T.Abbasov/ Sabiq iqtisadi inkişaf naziri Fərhad Əliyevin apellyasiya şikayəti üzrə proses başlayıb.
Cümə axşamı Bakı Apellyasiya Məhkəməsində keçirilən prosesdə sabiq nazirin vəkili Əlimərdan Sadıqov cinayət işinin materialları ilə tanış olmaq üçün məhkəmədən vaxt istəyib. Məhkəmə onun xahişini nəzərə alaraq prosesin iyunun 24-dək təxirə salınması barədə qərar qəbul edib.
Sabiq iqtisadi inkişaf naziri Əliyev və onun qardaşı, "Azpetrol" şirkətinin keçmiş prezidenti Rafiq Əliyev 2005-ci ilin oktyabrında həbs edilib. Həmin vaxt onların hər ikisi dövlət çevrilişi və kütləvi iğtişaşlar hazırlamaqda ittiham edilib.
Sonradan F.Əliyevə Cinayət Məcəlləsinin 179.3.1-ci (mütəşəkkil dəstə tərəfindən mənimsəmə və rüşvət alma), 179.3.2-ci (külli miqdarda mənimsəmə və israfetmə), 192.2.1-ci (külli miqdarda gəlir əldə etməklə qanunsuz sahibkarlıq), 192.2.2-ci ( mütəşəkkil dəstə tərəfindən qanunsuz sahibkarlıq), 206.4-cü (qaçaqmalçılıq) ,213-cü (vergi ödəməkdən yayınma), 308.2-ci (vəzifə səlahiyyətlərindən sui-istifadə), 311.3.1-ci (qabaqcadan əlbir olan bir qrup şəxs və ya mütəşəkkil dəstə tərəfindən rüşvət alma), 311.3.2-ci (rüşvət alma təkrar törədildikdə), 311.3.3-ci (külli miqdarda rüşvət alma), 313-cü (vəzifə saxtakarlığı), R.Əliyevə isə 213-cü (vergi ödəməkdən yayınma) və 206.4-cü (qaçaqmalçılıq) maddələrlə ittiham elan edilib.
Fərhad və Rafiq Əliyevlərə qarşı dövlət çevrilişi və kütləvi iğtişaşlar hazırlanması ilə bağlı elan olunan ittihamla r isə ayrıca icraata götürülüb.
Ağır Cinayətlərə Dair İşlər üzrə Məhkəmənin hökmü ilə əmlakı müsadirə olunmaqla sabiq nazir 10, qardaşı isə 9 il azadlıqdan məhrum edilib. Həmçinin məhkəmə Fərhad və Rafiq Əliyev qardaşlarının həbsdən azad olunduqdan sonra 5 il müddətinə dövlət vəzifəsi tutmalarını qadağan edən qərar çıxarıb.
Müəlliflə əlaqə saxlamaq üçün elektron ünvan - [email protected]
