Azərbaycan, Bakı, 25 iyun / Trend , müxbir K.Zərbəliyeva/ Azərbaycanda 142 vakant dövlət qulluğu vəzifələrinin tutulması ilə bağlı elan olunmuş müsabiqəyə sənəd qəbulu başa çatıb.
Prezident yanında Dövlət Qulluğu Məsələləri Komissiyasından verilən məlumata görə, həmin vakant yerlərə 98 namizəd qeydə alınıb.. 12 dövlət orqanında inzibati vəzifələrin altıncı - doqquzuncu təsnifatlarını əhatə edən bu vəzifələrdən 83 ü (58,45%) Əmək və Əhalinin Sosial Müdafiəsi Nazirliyi üzrədir. Qeydə alınmış 98 namizəddən 47-si (47,96%) də məhz bu dövlət qurumuna sənəd verib. Müsahibədə 1 vakant vəzifə ilə iştirak edən Sənaye və Energetika Nazirliyi üzrə heç bir namizəd qeydə alınmayıb. Dövlət Şəhərsalma və Arxitektura Komitəsində 16 yerə 8, Dövlət Statistika Komitəsində 16 yerə 4, Gənclər və İdman Nazirliyində 7 yerə 9, İqtisadi İnkişaf Nazirliyində 5 yerə 8, Tarif Şurasının Katibliyində 4 yerə 2, Kənd Təsərrüfatı Nazirliyində 3 yerə 11, Daşınmaz Əmlakın Dövlət Reyestri Xidmətində 3 yerə 5, Müəllif Hüquqları Agentliyində 2 yerə 2, Qaçqınların və Məcburi Köçkünlərin İşləri üzrə Dövlət Komitəsində 1 yerə 1, Rabitə və İnformasiya Texnologiyaları Nazirliyində 1 yerə 1 namizəd sənəd verib.
Komissiyadan bildirilib ki, iyunun 18-də Gənclər və İdman, Təhsil və İqtisadi İnkişaf Nazirliklərində müsahibəyə çıxarılan 3, 10 və 13 vakant dövlət qulluğu vəzifələrinin tutulması üçün sənəd qəbulu iyulun 7-dək davam edəcək.
Komissiyanın sədri Bəhram Xəlilov bir neçə gün əvvəl mətbuata açıqlamasında vakant dövlət qulluğu vəzifələrinə keçirilmiş müsabiqələrin nəticələrindən razı qalmadığını bəyan edib.
O, müsabiqələrdə iştirak etmiş namizədlərin təhsil səviyyəsi və dünyagörşünün aşağı olduğunu vurğulayıb.
Komissiya sədrinin sözlərinə görə, Komissiyanın indiyədək keçirdiyi dörd müsabiqədə iştirak etmiş 5000 -dən çox namizəddən 289-u dövlət qulluğuna qəbul olunub.
Müəlliflə əlaqə saxlamaq üçün elektron ünvan - [email protected]