Azərbaycan, Bakı,01 avqust / Trend , müxbir K.Zərbalıyeva/ Ali Məhkəmə və Bakı, Gəncə, Sumqayıt və Şirvan Apellyasiya məhkəmələrinə təyin olunmuş hakimlər bu gündən sələhiyyətlərinin icrasına başlayıblar.
Bu haqda cümə günü Trend -a Məhkəmə -Hüquq Şurasından məlumat verilib.
Şuradan bildirilib ki, Milli Məclis 13 iyun 2008 -ci il tarixli qərarında təyin olunmuş hakimlərin avqustun 1-dən fəaliyyətə başlayacaqları qeyd olunub.
Məhkəmə -Hüquq Şurası prezidentə həmin məhkəmələrə hakim işləmək üçün namizədlərin siyahısını təqdim edib.
Ali Məhkəməyə 6, Bakı Apellyasiya Məhkəməsinə 12, Gəncə Apellyasiya Məhkəməsinə 3, Sumqayıt Apellyasiya Məhkəməsinə 6, Şirvan Apellyasiya Məhkəməsinə 3 yeni hakim təyin olunub.
Azərbaycanda hazırda 327 hakim fəaliyyət göstərir.
Bu təyinata qədər Ali Məhkəmənin 27, Bakı Apellyasiya Məhkəməsinin 31, Gəncə, Sumqayıt, Şirvan və Şəki şəhər Apellyasiya məhkəmələrinin hər birində 7 hakim işləyirdi.
Qanunvericilikdə Ali Məhkəmənin hakimlərinin sayı 45, Bakı Apellyasiya Məhkəməsində 50, digər apellyasiya məhkəmələrində isə, 14 nəfər müəyyənləşdirilib.
İmtahanlarda uğur qazanmış 102 namizədin siyahısı hakim təyin olunmaq üçün ölkə başçısına təqdim olunub.
Azərbaycan hakimlərinin sayına görə, Avropa ölkələri sırasında sonuncu yerlərdən birini tutur. Hakimlərin sayının azlığı məhkəmələrdə iş yükünün çox olmasına səbəb olub.
Ötən il bütün hakim korpusunun fəaliyyətinin qiymətləndirilməsi nəticəsində 30 - dan çox hakimin səlahiyyətlərinə xitam verilib, habelə, son iki il ərzində 50 - dək hakim barədə intizam icraatı başlanılıb, o cümlədən korrupsiya hüquqpozmalarına yol verdiklərinə görə, 3 nəfərinin səlahiyyətlərinə vaxtından əvvəl xitam verilib, 3 nəfər isə aşağı işə keçirilib.
Ötən il ölkə başçısının fərmanları ilə hakim ştatları 50 faiz artırılıb. Bu isə hakimlərin iş yükünün və onların fəaliyətində süründürməçilik hallarının azalmasını, işlərə daha keyfiyyətli baxılmasını təmin edib.
Müəlliflə əlaqə saxlamaq üçün elektron ünvan - [email protected]
